KUCHING: AirAsia meri gerah deka nyambung baru penerebai dalam menua sida ari Pulau Pinang ngagai Kuching enggau Kota Kinabalu berengkah ari 31 March tu.
Serikat penerebai bilun tambang murah nya madah, mensia mayuh ulih meli tikit berengkah ari diatu lalu tambang sekali tuju berengkah ari RM119 ungkup penerebai ari Kuching ngagai Pulau Pinang.
Taja pia, AirAsia madah, penerebai ari Kota Kinabalu ngagai Pulau Pinang ungkup sekali tuju iya nya berengkah ari RM159.
Penerang sebaka madah, enti mensia mayuh meli tikit ari diatu nyentuk 18 Februari tu, sida deka ngasaika tambang rega promosyen penerebai kena 31 March nyentuk 30 November taun tu.
Ku penerang nya, pengawa meli tikit nya ulih digaga nengah aplikasyen AirAsia Superapp enggau website airasia.com.
“Pengawa ngelanchar baru penerebai bilun sekali tu diatur AirAsia Malaysia ari Kuching enggau Kota Kinabalu ti nyadi palan dikerindu temuai ari Utara Semenanjung Malaysia, Sabah enggau Sarawak.
“Kelimpah Pulau Pinang, bala temuai ari wilayah utara ti bukai nyengkaum Seberang Perai, Kedah, Perlis enggau Perak ulih ngasaika sambung penerebai bilun ti muntang agi ngagai Kuching enggau Kota Kinabalu.
“Sida mega bepeluang nyerungkai pemanah rampa menua, pengawa pesaka enggau bemacham budaya ba wilayah Borneo iya nya Sarawak enggau Sabah,” ku penerang nya kemari.
Ukai naka nya aja, AirAsia mega bela nyambung Kuching enggau Kota Kinabalu nengah penerebai terus ninting hari ti nyendia mayuh pilih ngagai bala temuai ti merambu pejalai enggau kemisi sida ngagai Sabah enggau Sarawak.
“Ari Kuching, bala temuai ulih nyerungkai palan bukai ba Sarawak nengah penerebai bilun terus ninting hari ngagai Sibu, Bintulu enggau Miri sereta ari Kota Kinabalu ngagai Sandakan enggau Tawau ba pantai timur Sabah.
“Nengah pengawa nyambung baru penerebai bilun nya, Pulau Pinang diatu ulih dilawa bala temuai ari Sarawak enggau Sabah ti deka ngasaika palan pematak temuai ti nyelai ba nengeri nya baka abi kaki kulinari, begunan sejarah enggau pemanah rampa menua.
“Pia mega, penerebai nya bela nyendia pejalai dua tuju ungkup sektor pelajar enggau dagang,” ku AirAsia.
