KUCHING: Serikat penerebai Sarawak diberi nama AirBorneo.
Pekara nya dipadah Premier Sarawak, Datuk Patinggi Tan Sri Abang Johari Tun Openg lebuh Pengawa Nyain Sempekat Jual Beli (SPA) entara Perintah Sarawak enggau Malaysia Aviation Group (MAG) di Kuching, ditu tadi.
Nengah sempekat nya, MASwings chara rasmi udah dipenggi Perintah Sarawak.
Lebuh bejaku, Abang Johari madah ke pengawa ngambi nya deka ngangkatka Sarawak nyadi hab penerebai besai ke Borneo sereta pintu penama ke ASEAN.
Tu mega deka ngerandang peluang nambahka rentayan penyambung ngagai domestik enggau antarabansa.
Sempekat nya disain entara Sekretari Perintah Sarawak, Datuk Amar Mohamad Abu Bakar Marzuki, ti ngari ke Perintah Sarawak enggau Chairman AirBorneo, begulai enggau Direktor Pengatur Pengawa Gerup MAG, Datuk Kapten Izham Ismail.
Abang Johari mega madah ke AirBorneo deka berenggat ngerembaika penerebai pengelama empat jam sebedau terebai jauh agi dudi hari enti sema makit penerebai begunaka ke nya.
“Kelimpah ari nya, AirBorneo nyadi serikat penerebai servis penuh deka ngatur pengawa kunsi strategik enggau sempekat bekunsi kod enggau serikat penerebai antarabansa ke bukai.
“Tu nyengkaum Malaysia Airlines, dikena ngerembaika rentayan penyambung global ungkup Sarawak,” terang iya.
