KUALA LUMPUR: Kompeni penerebai enggi Perintah Sarawak, AirBorneo Holdings Sdn Bhd nembuka pengawa ngambi MASwings Sdn Bhd berengkah ari 1 Januari 2026. Pengawa nurai sejarah besai nya diatur di Kuala Lumpur kena Hari Tiga ngaul diligit ari AirBorneo Holdings enggau Malaysia Aviation Group (MAG).
Datai ngari ke AirBorneo Holdings iya nya Sekretari Perintah Sarawak ti nyadi Chairman AirBorneo Holdings, Datuk Amar Mohamad Abu Bakar, Sekretari Pekara Wang Sarawak, Datuk Seri Dr. Wan Lizozman, Datuk Hasmawati, Kong Fook Ann, Rosleenda Sayumi, Megat Adrian Wira enggau Bruno Navet.
Seraya MAG diari ke Suresh Singam, Bryan Foong Chee Yeong, Captain Nasaruddin A. Bakar enggau Nur Syafiqah.
Sama datai bakih strategik enggau pekara undang-undang nyengkaum Datuk Azmi dari Azmi & Associates sereta pengari Rahmat Lim & Partners iaitu Azman Othman Luk enggau Moy Pui Yee, ti ngesan pangku pengawa besai ngatur pengawa dagang nya.
Nitih penerang ari AirBorneo dikeluar sehari tu, ari ngenapka pengawa ngambi nya, kompeni nya deka ngambi semua tanggungpengawa undangundang enggau operasyen MASwings berengkah ari 1 Januari 2026, berindik ari tanggam Sempekat Jual Beli entara Perintah Sarawak enggau MAG kena 12 Februari 2025.
Ba pun pengawa ngambi nya, pengawa mali baru nama MASwings deka diteruska, seraya AirBorneo ngelanchar identiti chap dagang baru berenggat.
“AirBorneo meri terima kasih ke kerejasama enggau pemereti ati bala penumpang, bakih kunsi sereta raban bisi kaul besai sekumbang timpuh bekalih pengawa nya.
“Pengawa ngambi tu nyukung tuju strategik Perintah Sarawak negap rentayan penyambung langit serantau sereta nentuka tambang ulih dibayar ungkup Sarawak enggau rayat menua nya.
“Tu mega siti pengawa besai dikena nyukung agenda pemansang sosial enggau ekonomi nengeri, kelimpah netap pemun ba pejalai kompeni penerebai udah tu nyadi AirBorneo,” ku penerang nya. Iya nerang, Perintah Sarawak meri terima kasih ngagai semua staf, bakih kunsi enggau raban bisi kaul besai ti udah nyukung sida sekumbang proses transaksyen enggau bekalih pengawa nya.
Iya mega madah, juluk bekaul pekara operasyen enggau proses bekalih benung dipejalai deka dipadah AirBorneo belama. – EDISI UKAS
