KUCHING: AirBorneo nyendia tikit ungkup penerebai Kuala Lumpur-Kuching ti deka beoperasyen dua kali sehari kelai inisiatif beguna nentuka kompeni penerebai nya mekuh rentayan langit entara Sarawak enggau Semenanjung Malaysia.
Pengawa nyendia tikit nya mega dientudi nerang ke tambang Sarawakku Sayang ti nyendia rega belabuh RM375 nyengkaum semua chaj ungkup tikit kelas ekonomi seraya kelas dagang disedia bepun enggau rega RM736.
Ku penerang AirBorneo, servis baru nya beoperasyen entara Padang Bilun Antarabansa Kuching enggau Padang Bilun Antarabansa Kuala Lumpur Terminal 1 lalu negap pangku pengawa Kuching nyadi pintu penama strategik sereta nyendia mayuh agi pilih penerebai ngagai penumpang ungkup tuju raun enggau dagang.
Tambah mega, penerang nya madah ke tambang Sarawakku Sayang nya nyengkaum chukai padang bilun enggau surchaj bahan api, nitih ke atur ditetap.
“Tikit ulih dibeli belabuh ari pukul 7 pagi (GMT+8) kena 7 Julai 2026, enggau terebai belabuh 20 Julai 2026.
“Tikit semina ulih diudar nengah website rasmi AirBorneo sereta aplikasyen AirBorneo.
“Nengah nyendia tikit eksklusif nengah pelasar rasmi, AirBorneo nentuka penguna ngasai ke tambang pemadu baru ti dikenuku kompeni, rega enggau transaksyen likun, sukung penguna sereta ngemaru tikit,” ku penerang nya.
Nangkan nya, Tuai Pegawai Eksekutif AirBorneo, Megat Ardian Aminuddin madah, pengawa nyendia jual tikit ungkup penerebai Kuala Lumpur nya mega pemujur besai ba pejalai pemansang AirBorneo laban kompeni terus negap rentayan langit Sarawak enggau selampur Malaysia enggau endur bukai.
Ku penerang nya, Kuala Lumpur nya pintu penama strategik ti ngerembai akses ngagai palan domestik sereta antarabansa lalu nyendia mayuh agi peluang ba sektor dagang temuai, dagang enggau pengawa meranak puku.
“Kuala Lumpur nya pintu penama strategik ti ngerembai akses ngagai palan domestik sereta antarabansa, nyendia mayuh agi peluang ungkup dagang temuai, dagang enggau pengawa meranak puku.
“Nyadi kompeni bilun Sarawak, kami keran ngaul komuniti, dagang enggau peluang nengah rentayan langit ti likun, ulih dipechaya sereta patut.
“Pengawa nyendia tambang Sarawakku Sayang nya sebagi ari pengawa nya ngujungka penerebai muntang agi diakses seraya nyukung juluk Sarawak nuju rentayan langit ti entap agi, pemansang dagang temuai enggau pemansang ekonomi meruan,” terang iya.
Penerebai Kuala Lumpur nya mega pemujur keterubah ba strategik ngerembai rentayan timpuh panjai AirBorneo.
Nipak pemansang kompeni bilun nya, AirBorneo meruan negap rentayan langit Sarawak, nyukung pemansang dagang temuai enggau ekonomi kelimpah nyendia servis penerebai ti likun, ulih dipechaya sereta berega ngagai komuniti.
