SEMPUN pengerindu apai seduai indai nyadi peransang Megdaline Maju nyentuk bulih pemutus nyulut ba Sijil Pelajaran Malaysia (SPM).
Megdaline ke mega asal ari Song, Kapit madah, apai enggau indai semampai narak pemesai reti enda mudah putus pengarap ba pengawa sekula.
Iya mega mujur bulih pemutus nyulut ba SPM iya nya 8A 2B.
“Naka pengaga ba kandang dada lebuh meda pemutus peresa diri, enda ngadang, enda ulih ditiu ngena leka jaku pengudah bala pengajar nyuaka pemutus nya ngagai kami.
“Berasai temegah mega lebuh diri empu ulih niki atas panggau lalu dipeda apai indai.
“Tambah mega, seduai suah meri peransang ngicha ke aku ulih mujur baka anak orang bukai.
“Kelimpah ari apai seduai indai, bala menyadi mega suah ngajar aku belajar bebendar ngambi bulih pengidup ti menyana dudi hari,” ku iya ngepun randau.
BEREKAT SUKUNG
Tambah mega, Megdaline madah, pemujur iya ba pekara pelajar nya berekat sukung semua kelebih agi apai indai, bala menyadi, pengajar enggau bala bakih.
“Ngena peluang tu, meri besai terima kasih ngagai bala pengajar enggau bala bakih ti enda sanggu bekunsi penemu.
“Bala pengajar enda kala leju, enda kala nganu lebuh kami nanya bemacham tanya nyentuk utai nya nyengala ditemu kami.
“Bala bakih mega semampai mai aku sama belajar lalu sama betanya pangan diri nyema bisi utai enda ditemu.
“Naka ulih meh kami marit enggau ngirit pangan diri ngambi sama nyulut ba pelajar.
“Terima kasih mega ke jaku peransang kita ngagai aku ngelama tu.
“Jaku peransang, jaku ajar sereta pementas kita enda rangka bekunsi penemu meruan dikenang aku,” terang iya.
RESIA
Lebuh ditanya pasal resia nyulut ba SPM, Megdaline madahka diri ngembuan runding enggai masau awak belajar betaun tebasau pia aja.
Ku Megdaline, pemutus SPM tu deka nentuka singkang pejalai kitai sekali ke nampung pelajar ngagai tikas ke tinggi tauka gawa.
“Laban diri empu ngembuan penetap penemu enggai masau awak belajar, nya kebuah naka ulih nambah penemu lalu suah agi betanya ngagai bala pengajar.
“Maya ba sekula, anang sesekali ngembuan runding malu betanya, enti nuan malu kemaya nuan deka nemu sebengkah topik dipelajar nya deh?
“Buai asai malu lalu suah agi betanya ngagai bala pengajar nyema bisi utai ke empai nyentuk pasal sesebengkah topik.
“Suah agi nuan betanya, mayuh agi ga penemu baru dikembuan nuan.
“Nya pemanah rindu betanya ngagai bala pengajar kelimpah sama belajar enggau bala bakih,” terang iya.
SAMPI
Lebuh nerang pasal resia bukai tau nyulut ba SPM, dia iya madahka kitai meseti suah besampi.
Ku Megdaline, sebedau ngepunka sebarang pengawa kitai meseti besampi dulu minta berekat ngagai Petara ngambi semua pengawa lanchar.
Ukai semina nya aja, iya madahka diri suah belajar kediri ba bilik lalu ngena pengelebih teknologi begiga penerang ke diguna nitihka pematut.
“Nya entara resia pemujur aku lalu besampika semua ti udah nerima peresa enggau benung beperesa nyulut,” ku Megdaline nyimpul randau.
