Ajat Iban enda tau lenyau ngapa

KUCHING: Tanda asal bansa Iban iya nya ngajat dikearap terus ditan sereta dikerembai kelebih agi ngagai nembiak rebak baru.

Chairman Gerempung Ngajat Asal Iban (Ngasi) Bartholomew Sirowchong madah iya besai amai pengarap meda ajat asal Iban enda lenyau.

“Pengarap aku ngagai ajat asal Iban ngambika tetap dijaga enggau meruan amat besai.

“Ngagai nembiak rebak baru anang rawan belajar ngajat laban gerempung kami ngelaluka penatai bala kita ti deka belajar ngajat,” ku iya.

Bartholomew bejaku munyi nya lebuh ditanya pemberita maya ngambi bagi Pengerami Ros-Care Jelajah Hiper’19 Zon Borneo Sarawak Bumi Kenyalang ba sebuah palan bebeli barang Petra Jaya ditu, kemari.

KELAI BASA…Bartholomew (empat kanan) nerima setipikit basa ari Ketuai Direktor JPPM Masyati Abang Ibrahim (lima kanan) kemari.

Ku iya, Ngasi ditumbuh ba taun 2015 ti semina ngembuan 15 iku raban aja.

“Diatu, kami udah bisi 80 iku kaban nyengkaum bala nembiak ti beumur enam taun ke atas.

“Tuju gerempung kami sigi endang deka ngetan sereta ngerembaika adat asal bansa Iban kelebih agi ngajat,” ku iya.

Tambah iya, Ngasai suah dikangau mandangka ajat ngagai opis perintah, sektor peribit enggau gerempung ukai dikuasa perintah (NGO).

“Gerempung Kuntau Dayak Sarawak (SDMAA) nya sebagai ari Ngasi laban kami nyadi pengatur muzik kuntau maya Festival Seni Bekuntau Dunya Chungju, Korea tu ila.

“Pia mega, ba bulan September ti deka datai kami nyadi pengari Sarawak mandangka ajat asal Iban ba Pengerami Gawai Tampun Juah,” ku iya.

Kelimpah ari nya, iya madahka raban sida bisi ngaga baju gagong dikena gerempung sereta dijual ngagai mensia mayuh.

Sapa bisi ati deka nyadi kaban Ngasi tau betanya ngagai Bartholomew ba lumur 0198163711 tauka Pengajar Ngajat Joefrazier Jeffry ba lumur 0168589364.