ENTI ditanya sapa idola, suah kitai nyebut orang ti tebangkar nama nadai ngira ba sebarang pengawa berindik ari pemujur ti udah dijapai sida ngelama tu.

Tang bebida enggau dara bajik tampun puji benama Mazzaellynn Brasenia Umang ti madah ke idola nya aki iya empu benama Henry Harry Jupa.

“Aki aku nya udah pinchin ngajar lalu iya mih ti suah ngajar aku senentang pemesai guna pelajar ba pengidup siku-siku mensia.

“Ari mit, iya meruan ngajar aku semampai ngemeratka pelajar lalu bebendar belajar.

“Aki mega ngajar aku anang mudah leju belajar tang meseti bisi tagit, nampung pelajar tikas pemadu tinggi.

“Kebuah pia laban pelajar nya kunchi nuju tangga pemujur ti ulih ngubah pengidup enggau runding kitai.

“Tambah mega, penemu ke diberi ngagai kitai nya chukup berega, lebih ari reta tengkira ba dunya tu.

“Enti nuan pintar sereta mayuh seling penemu, jalai ti repa ulih dirandang nuan laban nuan bisi kuing runding mutar ke penanggul ditapi kitai,” terang iya.

Ukai naka nya aja, Mazzaellynn mega madah, apai, Thomas Inau enggau indai, Maie Maranis mega entara orang ti balat meri peransang ngagai iya.

Peransang tu mega datai ari pengingin ati Mazzaellynn empu deka nampung pelajar ngagai tikas pemadu tinggi lalu ngembuan juluk ati nyadi entara siku indu Iban pemadu biak ulih nampung pelajar tikas PhD pengudah tembu Bachelor enggau Master’s Degree ba Universiti Malaysia Sarawak (UNIMAS).

SINGKANG PENGIDUP

Nampung baru randau, Mazzaellynn,24, madah, iya besai aria da nyentuk beumur 14 taun diau di Kuching sebedau pindah ngagai Betong ba taun 2014 lalu pindah ngagai Miri kenyau ari taun 2017 nyentuk diatu.

“Sebedau ngemanjai ke randau tu, dulu aku nerang pejalai pengidup diri kelebih agi pelajar aku ari primari nyentuk diatu.

“Aku sekula primari ba Sekula Primari (SK) St Theresa Padungan Kuching, udah nya ba sekondari, aku belajar di Sekula Sekondari (SMK) St Theresa, Kuching ari Pom Satu ngagai Pom Dua.

“Pom Tiga ngagai pun Pom Empat, aku besekula ba SMK Datuk Patinggi Kedit Betong, udah nya aku nampung pelajar ngagai Maktab Rendah Sains Mara (MRSM) Betong lebuh Pom Empat nyentuk Pom Lima.

“Pengudah nerima pemutus Sijil Pelajaran Malaysia (SPM) 2017, aku lalu ngisi UPU lalu pilih keterubah aku iya nya Asasi Sains Hayat ba UNIMAS.

“Puji Tuhan diterima lalu berengkah dia aku nambah ke penemu diri pengelama setaun ba Asasi UNIMAS, belabuh ari taun 2018 ngagai 2019.

“Sepengudah nembu ke program Asasi, aku lalu nampung pelajar ba UNIMAS mega dalam Bachelor Degree in Aquatic Science ari taun 2019 nyentuk 2022.

“Lalu sebedau konvokesyen Bachelor Degree, aku diberi UNIMAS peluang nampung pelajar Master’s Degree in Environmental Science (Land Use and Water Resource) ari taun Oktober 2022 nyentuk taun tu, graduet enggau CGPA: 3.79 kena 4 November 2024.

“Aku mega bulih projek ari bala pengelicha ba bulan September tu tadi lalu tebuka ati nampung pelajar tikas PhD bepun Oktober 2024 nyentuk diatu.

“Nya alai, arapka ba taun 2028 aku ulih graduet enggau ngembuan gelar Doktor Falsafah ba umur 28,” ku sampi sereta pengandal Mazzaellynn.

NGUBAH JALAI PENGIDUP

Nambah ke nya, Mazzaellynn madah, pelajar tu kunchi ngubah jalai pengidup kitai.

Mazzaellynn madah, sida sebilik chukup ngemeratka pelajar laban sida pechayaka nya jalai ngubah pengidup ti menyana agi.

“Baka aku laban datai ari ruang bilik jelan iya, indai aku orang ngintu ruang bilik lalu bisi empat iku anak enggau akua nak tuai.

“Dia aku ngasai ke tanggungpengawa nyadi anak tuai deka mantu apai indai sereta bala menyadi.

“Laban aku ukai org ke nemu bedagang (business), semina nengah chara belajar aja mih aku pechaya tu ulih dikena ngemansangka diri sereta ngembuan panjai runding enggau jauh timpai.

“Ari pelajar mega kitai ulih meri peransang ngagai orang bukai ngambi sama nyingkang enggau maju ba pengidup.

“Ba pengidup, nadai utai enda ulih dijapai kitai seagi bisi pengeran, pengingin enggau pengeransing nyapai utai dikedeka ati kitai.

“Resia iya, anang sesekali putus pengarap, enti penguji nya kelalu berat, ngetu ukai badu. Dia nyau bisi pengering, terus ke baru pengawa ti deka dikereja kitai.

“Genap pengawa dikereja endang bisi pemar tang nya nyadika pengering ngambi kitai ransing sereta bebendar agi nyentuk datai ba adan,” ku iya nyemetak.

NGEMBUAN TUJU

Nampung randau ke dalam agi, Mazzaellynn ngelalau raban nembiak ke benung belajar diatu, iya madah ke pemedis ngaga assignment nyentuk nyau deka putus pengarap nya endang udah adat kitai belajar.

“Ukai semina nuan aja ti ngasai baka nya tang semua nembiak. Reti tu tadi, anang irau ke nuan kediri ngasai ke utai baka tu.

“Ingat lalu pechaya mih, semua pengelelak nuan deka dibayar setipak enggau utai ti dikereja nuan.

“Belanja ukai nyadi penekul enggau penanggul nuan enda ulih nampung pelajar laban diatu mayuh bantu ari perintah baka Yayasan Sarawak ulih mantu kitai.

“Enti ba UNIMAS diatu sida bisi nyendiaka inisiatif B40 dikena nyaup nembiak ari ruang bilik kurang penatai pemisi, kita mega tau minta sadang penemu ari bala pengelicha enti bisi penanggul ba pelajar,” ku iya.

Berebak enggau nya ku Mazzaellynn, ari semua nya kitai meseti nemu lalu ingat ke tuju meseti beebndar belajar.

Tambah mega ku iya, maya ba campus, giga mih bala bakih ke ulih mai nuan nuju jalai ti betul.

“You are who you are around your circle. Enti ngasai ke pengawa digaga ba campus nya salah, nadai salah kitai ngelara pangan diri.

“Laban kadang kitai mudah tepejuh enggau endur baru baka entara kebuah kusut runding maya belajar laban enti ulih nelebaka diri enggau endur bukai.

“Enti stress belajar, ngetu dulu. Ninga lagu, tinduk enda lama lalu giga orang enggau berandau.

“Meseti pintar ngiga jalai mutar ke penanggul ditapi kitai nya,” ku pesan Mazzaellynn.

DISIPLIN

Sebedau ngujung ke randau, Mazzaellynn madah, genap nembiak meseti bisi disiplin enggau pintar magi awak diri.

Lebuh ditanya nama pekara bukai ti patut dikereja bala nembiak ngambi nyulut ba semua pengawa kelimpah ari belajar enggau bulih pemutus ti manah tiap semester, Mazzaellynn madah, kitai meseti pandai magi awak entara belajar enggau ngereja pengawa di luar.

“Utai ku aku tu tadi nya social life ti meri pangka positif lalu ukai reti kitai nunga laptop tauka amcha bup 24 jam.

“Bala nembiak patut keluar tang meseti ngaga tatak ngagai diri empu.

“Enti baka aku, aku nguji pansut ari comfort zone enggau nguji pekara baru.

“Tu nyengkaum masuk pekit pemajik gamal ba taun 2023 dikena ngelala orang bukai, nempa kaul baru enggau orang bukai seraya ngemanah pengelandik bejaku lalu begulai enggau orang bukai.

“Ari nya tadi, kitai ulih meda baka ni runding siku-siku mensia mayuh lalu ulih mega muai pengelelak maya belajar.

“Pekara kepenudi enggau pemadu beguna iya nya anang enda ingat ke pesan apai indai kelebih agi sida jauh ari kitai.

“Laban ba aku, jaku sida ulih meri berekat ngagai pengidup sereta semua pengawa dikereja kitai,” ku Mazzaellynn nutup randau.