KAPIT: Kerejasama rat entara Perintah Nengeri enggau Perintah Besai beguna endar nentuka akses pelajar enggau latih teknikal sereta vokasional (TVET) dikerembai ngagai komuniti menua pesisir, ku Sapit Menteri Digital, Datuk Wilson Ugak Kumbong.
Ku iya, Opis Menteri Pelajar, Inovasyen enggau Pemansang Penau Sarawak (MEITD) komited nentuka TVET nyadi tulang belakang pemansang pengereja pengawa Sarawak ti besemekih.
“Nengah pemisi belanja khas baka ti diberi ngagai BAKaT, mayuh agi komuniti menua pesisir ulih nguasa pengelandik baru ti beguna endar ti ulih ngubah tikas idup sida,” ku iya.
Ugak madah munyi nya lebuh bejadika Program POLYCC Sarawak BAKaT: Ngempung, Aplikasyen Pengelandik enggau Transfomasyen (BAKaT) di Rumah Undi Langkau, Nanga Plak Sungai Bena Sut Balleh, Kapit.
Program ti dipelanja penuh MEITD tu meri peneleba ngagai komuniti menua pesisir ba bidang kulinari, aplikasyen digital, dagang temuai, teknologi gadung (solar) enggau pengelikun kuasa karan.
