Ali Biju sigi dikelalu nyema tama PDP

SARATOK: Raban Nembiak Parti Progresif Demokratik (PDP) madah ke diri sigi gaga ati sereta ngelalu nyema Ali Biju bisi perambu deka nyereta parti sida.

Ketuai Raban Nembiak PDP, Robert Ayu madah iya ngarika kaban Supreme Kaunsil PDP tebuka nerima penatai Sapit Menteri Pengeluar Kuasa enggau Pengeraja Asal nya enggau bala penyukung iya nyema sida bisi ati deka masuk PDP.

“Tang semua nya meseti nitihka atur dalam parti lalu nerima pemendar ari Supreme Kaunsil enggau semua raban parti,”tandu iya.

Iya madah munyi nya rambau Program Gempuru Ngemekuh Kaul Pengari enggau Rayat ba Rumah Jaga,Nanga Gerenjang, Ulu Krian kemari.

Sekretari Politik Kepala Menteri nya mega madah nadai chalun bukai dipilih bediri ba sitak Krian ngarika PDP naka tu kelimpah ari Jeffry Jimbun Walter Kidang.

“PRN-12 diatur enda lama agi, enti nitihka timpuh Kaunsil Nengeri (DUN) abis timpuh ba Jun 2021.

“Endang ari suba, penuduk Dun Krian endang diempu PDP sebedau Datuk Peter Nyarok alah ngelaban Ali Biju ti bediri ngena tiket PKR.

“Nya alai, sekali tu mega kitai sekali agi ngetanka penuduk asal kitai ba Krian nengah chalun ti chukup bepenau iya nya Chairman PDP Krian empu,”ku iya.

“Sebedau tu, ba aum Supreme Kaunsil Parti PDP ke diatur apin lama ba Kuala Lumpur enggau Kuching endang udah nyemetak sereta semua setujuka Jimbun nyadi chalun ngarika GPS/PDP ba PRN-12 tu ila.

“Endang nadai nama bukai dianjung bediri ari PDP maya nya ila kelimpah ari iya (Jimbun),” ku iya.

Nambah nya ku iya, enti nitih kitai (PDP) ba Krian tu deka ‘besatup’ enggau pengari ke diatu iya nya Sapit Menteri Pengeluar Kuasa enggau Pengeraja Asal, Ali Biju.

“Tang enda nyadi laban berindik ari jaku iya empu apin lama, ti madahka diri deka meri sukung ngagai Gempung Parti Sarawak (GPS) maya bepilih tu ila.

“Nya alai, enti amat iya enda bediri lalu nyukung kitai munyi ku iya apin lama, aku chukup temegah nyema iya ulih mansutka sekeda penemu enggau buah runding dikena nyaup GPS maya kimpin ila ke mega berindik ari tuju ti deka sama nyungkak ikas pendiau rayat Krian ti balat begunaka pemansang diatu.

“Nyadi ba aku, tu siti berita manah lalu ngarapka pengundi ditu (Krian) pan ulih ngembuan runding ti sama enggau ‘Yang Berhormat’ Ali ke pemaik semua peranak Krian.

Sama bisi datai Penghulu George,Kr.Andrew Rajau,Kr.Bong Chow Wei,Kr.Walter Kidang,bala tua rumah enggau bala bukai.

Ungkup penemu, kepenudi PDP megai kuasa ba sitak Krian iya nya ba PRN-11 sebedau Adun Krian Datuk Peter Nyarok anak Entri alah ngelaban Ali Biju (PKR) enggau majoriti 2,090 iti undi.

 

Suara Sarawak