SARATOK: Rayat Rumah Gending, Emplaie Ulu ditu diatu badu agi berasai irauka pengelikun diri.
Tuai Rumah Gending madah, ngelamatu sida semampai nangi laban tiang api kelalu semak enggau rumah lalu tau ngeruga pengelikun sida serumah.
“Kami irau amat nangika tiang api tumbang dipangka nyitar tauka sambung tali karan sut lalu tau ngasuh penusah angus nyadi.
“Nya alai kami udah minta tulung pengari rayat ditu mutarka penanggul ditapi kami diatu,” ku iya.
Sapit Menteri Pengeluar Kuasa enggau Pengeraja Asal ti mega Kaban Parlimen Saratok, Ali Biju berumban nangkup peminta sida Gending serumah laban berundingka pengelikun rayat dia.
Ali diarika ex-Pengajar Alvin Morris udah nyuaka chek Projek Mit Pemansang Menua Pesisir (MRP) penyampau RM15,000 ngagai Komiti Pemansang enggau Pengelikun Genturung Pendiau (JKKK) rumah panjai nya, ditu lemai tadi.
Ku Ali, agih belanja nya dikena nyaup sida Gending mindahka tiang api nentuka pengelikun rumah panjai nya dijamin.
Berebak enggau nya, Tuai Rumah Gending ngarika sida serumah meri besai terima kasih ngagai Ali laban udah nulung mutarka penusah sida enggau lengkas.
