MIRI: Kandang menua emperan ba ulu Baram enggau Subis kena tuntung penusah bah beduduk ari ujan bangat berapa hari ke udah ngujungka entukar enda ulih betengahka sekeda jalai.
Tuai Opis Bomba enggau Penyah Penusah Malaysia (JBPM) Zon 6, Penguasa Kanan Bomba I Law Poh Kiong madah, Sekula Primari (SK) Pengarah Enteri entara endur ke bah penalam empat kaki setengah.
“Jalai Kampung Matik enggau jalai kampung Mison nuju ke sekula nya bah penalam empat kaki setengah enggau enda ulih ditengkah semua entukar enggau mensia mayuh ketegal ai deras,” ku iya nerang, ditu kemari.
Poh Kiong madah, entara sitak bah penalam empat kaki iya nya baruh begunan sekula enggau opis, gelanggang sepak takraw, rumah pengajar, dewan makai enggau padang sekula.
Nambahka nya ku iya, SK Long Wat mega dituntung penusah ke sebaka pengudah bah penalam empat kaki enggau jematan kedua rumah pengajar mega tenggelam.
“Kampung Long Atip Baram meda udah bah kelima kali lalu nya penusah nya balat nyadi lebuh tikas ai majak niki naka pukul 8.40 pagi kemari.
“Pia mega, tikas ai ba Kampung Long Sobeng Baram mega majak niki,” terang Poh Kiong.
Kepala Pengajar SK Long Loyang, Mering Ajang madah, sekula nya mega napi penusah bah tunggal peninggi empat kaki.
Ku iya, naka pukul 7.36 pagi kemari tikas ai niki penalam empat kaki ke alai dalam kelas mega udah ditiki ai bah.
Ba Pelilih Subis, Poh Kiong madahka Rumah Nelson Ningkan enggau Rumah Bulih Nyalu di Sungai Saeh Niah diripotka napi penusah bah.
Ku iya, jalai ngelawa rumah panjai nya semina ulih ditengah entukar 4WD.
“Jalai tama ngagai Rumah Bulin engka enda ulih ditengah enti ujan majak bangat ba ulu,” terang iya.
Nangkan nya ku iya, jalai nuju Rumah Edward Ekau Sungai Serungut mega enda ulih ditengkah entukar laban jalai nya balat jai enggau belubang.
Pekara tu mega diripotka nyadi ba Rumah Lingu Pakut Sibuti lebuh jalai tama ngagai genturung pendiau nya enda ulih ditengah entukar.
