Amu mayuh rambang, pengajar rugi RM391,550

SIBU: Ulah kelalu deka mayuh rambang ngujungka siku pengajar indu ditu rugi RM391,550 pengudah tepejuh labuh pengerindu enggau dua lelaki dikelala nengah online.

Penusah tu nyadi bulan Disember taun nyin tadi tang indu beumur 47 taun nya semina ngaga ripot polis kena 7 Ogos tu tadi.

Ketuai Polis Pelilih Sibu ACP Stanley Jonathan Ringgit ba sebengkah penerang kemari madahka indu nya ditipu saspek keterubah RM298,550 enggau RM93,000 sulu ti kedua.

“Pun bulan November taun nyin tadi, iya ngelala siku lelaki ti madahka nama diri ‘Roy Lim Cheng’, gawa nyadi mekanik sebuah serikat minyak enggau gis di Los Angeles nengah Facebook,” ku iya.

Udah nya ku Stanley, kena 18 Disember tu yadi, Roy madahka diri deka nganjung jam tangan, laptop, emas enggau belanja penyampau RM70,000 atas nama pengerindu.

“Empat hari udah nya, siku lelaki ari sebuah serikat kurier telefon lalu madah ngagai iya bisi utai dikirum ngagai iya udah datai lalu dipinta mayar RM14,700, bayar nganjung,” ku iya nerang.

Ku Stanley, pengajar nya mega dipinta mayar bayar tambah ungkup duti kastam, insurans utai dikirum nya enggau bayar ngagai Duta Amerika.

Nadai nyagam utai salah nyadi, ku iya, indu nya nurutka jaku lalu mindahka duit sepenyampau RM298,550 kenyau ari 24 ngagai 26 Disember taun nyin tadi.

Berebak enggau nya mega ku Stanley, indu nya mega limpang bekelala enggau siku lelaki bukai benama ‘Henry’ di Facebook.

“Henry udah nya madahka diri deka nganjung tanda penyayau ngagai iya baka jam tangan, laptop enggau mata duit RM40,000,” ku iya nerang silik.

Serak tu indu nya mega dipinta mayar RM70,000 ngambi ulih nerima utai dikirum nya.

Pengudah mayar, iya lalu nadai nerima sebarang utai ti dikirum baka ti udah disemaya.

“Kes dipansik nitihka Seksyen 420 Kanun Keseksaan laban nipu,” ku Stanley madah nyemetak.

Suara Sarawak