SARATOK: Buai peragam tauka penemu ti semina bepanggai penuh ba Opis Bomba enggau Penyah Penusah Malaysia (JBPM) lebuh bisi penusah angus.
ADUN Kalaka, Mohamad Duri nyemetak madah, penyedar ngembuan perengka ngerara api patut ditarak.
Komuniti kemaya hari tu, ku iya, lebuh besebut senentang penusah angus, sida semina nemu bepanggai ba bomba.
“Komuniti patut bisi penyedar ngembuan perengka ngerara api ngambi enda bepanggai penuh ba JBPM.
“Lebuh bisi penusah angus, pengawa nganti penatai raban bomba nya nyangka begunaka sekeda timpuh sereta enda ulih nyelamatka reta tengkira ari angus.
“Keterubah, api nya semina mit aja tang udah nya nyerarai besai ngagai endur bukai.
“Nya alai, pangku pengawa nyaga nyawa enggau reta tengkira nya ukai semina bepanggai ba raban penyelamat tang ba kitai empu.
“Dikena mutar pekara tu, pengawa ngena perengka ngerara api beguna amat lalu sapa-sapa aja ulih ngena enggau ngerara api ngena nya.
“Nembiak beumur lima taun pen nemu ngena perengka tu enti sida diajar chara ngena dikena nyelamat nyawa enggau reta tengkira,” terang iya.
Mohamad Duri mansutka jaku nya rambau bejadi Program Penyedar Pengelikun Penusah Angus sereta Program Ngintu Genap Taun Ke-7 Gerempung Indu Rumah Panjai Dom Brues Michael Gomes ditu, kemari.
Terang iya, komuniti enda tau nyalah raban bomba enti sida laun datai tauka betapika penanggul peneras ai ti lubah.
