KUCHING: Ulah kelalu irau lebuh napi penusah angus nyadi siti ari pun penyadi kes rumah angus enda mujur diseliah ba renggat tumu.

Direktor Opis Bomba enggau Penyah Penusah (JBPM) Sarawak, Datuk Khirudin Drahman madah, chara pemadu manah ngerara api lebuh bisi penusah angus iya nya nyeliahka api ari ngerarai.

“Enti kitai kelalu irau, kitai deka lenyau runding lalu ngambi pemutus ninggalka palan angus tu tang kebendar kitai ulih madam tauka nyeliahka api ari ngerarai.

“Enti penusah angus nyadi ba rumah, tentu ke suis besai ba rumah ditutup lalu kena meh pemansut ai ti bisi dikena ngerara api,” ku iya.

Khirudin mansutka nya rambau Program Nyuaka Kereban Pengerara Api ngagai komuniti Kampung Selangan Batu ditu, sehari tu.

Ku iya, genap kali penusah angus nyadi, lima minit keterubah nya peluang pemadu beguna ngagai orang ti diau semak ba endur nya meri timbal tauka bejalaika pengawa ngerara api.

“Kitai ti dituntung penusah tu meseti berundingka pengawa ti patut digaga dikena ngerara api seraya nganti raban bomba datai.

“Enti kita nyau nganti kami (bomba) datai, rumah kita engka udah angus lengis tang enti kita ngerara api tumu dalam timpuh lima minit keterubah, kita ulih nyelamatka rumah kita empu,” ku iya.