KUCHING: Semua parti dilalau enda ngajum runding pengundi biak kelebih agi sida ti beumur 18 ngagai 25 taun ngena sentimen ekstrim bepelasarka bansa enggau jalai pengarap sebedau pengawa Bepilih Besai (PRU) Sarawak Ke-13 tu.
Tuai Pemadah, Parti Pesaka Bumiputera Bersatu (PBB), Datuk Seri Abdul Karim Hamzah madahka raban nembiak patut diberi ruang enggau chara tebuka dikena nempa penemu politik sida ngambika sida ulih ngaga pilih bepelasarka penemu enggau perati sida empu.
“Pengundi biak deka bejalaika tanggungpengawa besai ba pengawa bepilih tu berindik ari penyampau sida ti mayuh, iya nya pengundi baru dipelabaka mungkur urung 40 peratus.
“Semua raban bisi tanggungpengawa ngelawa raban nembiak sereta meri sida penyedar politik ti sebela dikena nempa runding baru ngagai politik menua kitai,” ku iya bejaku rambau aum pemberita ba Begunan Baitulmakmur II ditu, kemari.
Abdul Karim nyemetak madahka pengundi biak enda patut dirachun runding laban sida tu raban ti benung belajar sereta dikearapka ngembuan penau nyeremih chalun ti enggemkan narika sida.
“Anang ngeracun runding sida enggau sentimen ti kelalu baka pekara bansa, bejaku ngagai sida anang ngundi tauka enti ukai penyukung kitai, anang ngundi.
“Kitai enda patut ngiri sida enggau penemu politik ti enda manah,” ku iya.
Iya madah, raban nembiak patut ditempa nyadi pengundi ti tebuka runding sereta ulih ngaga pemutus kediri empu ngagai chalun ti bediri minta pilih.
Penyandang Asajaya nya madahka penyampau pengundi ba Asajaya ngelui 12,000 iku ba pengawa bepilih sebedau tu ti dipelaba nambah ngagai lebih 19,000 iku nitihka rintai nama pengundi nyentuk bulan Mei 2026.
Ku Abdul Karim, penyampau nya dipelaba majak nambah ngelui 20,000 iku berindik ari tabah sekeda pengundi baru naka bulan September 2026.
Iya beratika pemesai guna semua raban nyengkaum apai indai enggau komuniti bejalaika tanggungpengawa ngembing raban nembiak enggau manah ngambika sida ulih nyadi pengundi ti tuai runding sereta ngaga pilih ti rasional.
