PETALING JAYA: Pemansang mengeri enda tau semina nyelinting pengawa ngaga infrastruktur enggau ekonomi tumbuh aja, tang patut berati ka rumah ulih dibeli, pengangkut mensia mayuh ti sikar enggau pengelantang rayat.
Premier Sarawak, Datuk Patinggi Tan Sri Abang Johari Tun Openg madah, perambu begulai, atur gawa ti nemban enggau pemansang ngira rayat nyadi pemun dikena numbuhka mengeri meruna ti tegap napi pemar dudi hari.
“Pemansang mengeri beguna ka pengawa nyeraris rat entara raban perintah lokal, ejensi perambu, operator pengangkut enggau raban matau rampa menua dikena nentuka tetiap polisi digaga nyerangkung semua.
“Nya alai, mengeri ti meruan agi bepanggai ba institusyen ti ulih ngengka polisi ba pemutus ti konsisten, lurus enggau diseraris manah,” ku iya nyemetak.
Abang Johari nibarka jaku nya lebih nutup Kongres Perambu Nasional Ke-11 Taun 2026 ngena sulu jaku Nyadi Tuai Mengeri Ti Meruan Agi: Tanggungpengawa Kita Begulai ba Balai Sivik, Kaunsil Mengeri Petaling Jaya, ditu, ensanus.
Iya nerang, pengelim pengawa nyeraris entara ejensi tau ngasuh pemansang pengawa berumah digaga nadai diskap perengka pengangkut mensia mayuh ti chukup, sistem parti enggau utiliti ti enda engkem sereta kaul komuniti mega lunggar.
Nya alai, iya nyemetak madahka ubah klimet patut dipedua ka perambu mengeri, nyengkaum pemansang sistem pengangkut mensia mayuh ti beresi agi enggau nambakha rentayan penyambung ba mengeri.
“Projek Transit Aliran Autonomi (ART) ngena kuasa hidrogen ari baruh Sistem Pengangkut Mengeri Kuching (KUTS) nyadi chunto pengeran Sarawak nyendia ka pengangkut mensia mayuh ti beresi agi enggau nambakha rentayan penyambung ba mengeri.
“Pia mega pengawa ngintu kampung, tanah embap enggau menua kerapa bela beguna dikena nyimpan karbon, nyaga biodiversiti sereta nambahka peneguh nengeri tu napi empas ubah klimet,” ku iya.
Ngenang bekaul pemansang mengeri dudi hari, Abang Johari madahka pengawa ngena pemintar digaga (AI), sistem penerang geografi enggau analisis data mengeri ulih nambakha penyikar perambu ngena tanah, ngatur infrastruktur sereta nyerineh penanggul klimet.
Taja pia ku iya, teknologi nya patut dikena ngena chara bisi tanggungpengawa ngambi pemansang mengeri endang tetangkupka utai diguna rayat.
