Anang ngelak isu rumah ngenusah peranak Bintulu

Program RMM patut diperunding ba empat sitak ke balat dedat laban mensia

“Pangka pemansang industri enggau proses urbanisasyen mai mengeri Bintulu dedat laban mensia lalu ngujungka tebantai penanggul nyengkaum isu rumah baka rega suwa ti kelalu mar.”

KUCHING: Opis Menteri Pengawa Berumah diansak lengkas mutar penanggul bekaul enggau isu rumah ke ditapi peranak Bintulu.

Adun Samalaju- PRS Majang Renggi madah program nyendia rumah baka rumah ulih dibeli (RMM), program rumah rayat enggau ke bukai patut diperunding ba sitak Kidurong, Jalai Tebing Pantai Bintulu- Samalaju, Jalai Bintulu-Miri enggau Taman Eko Samalaju.

“Pangka pemansang industri enggau proses urbanisasyen mai mengeri Bintulu dedat laban mensia lalu ngujungka tebantai penanggul nyengkaum isu rumah baka rega suwa ti kelalu mar.

“Nembiak rebak baru ti baru bulih pengawa tauka sida ti gawa kurang ari tujuh taun sereta penatai pemisi kurang RM4000 chukup ngasaika penanggul tu,” ku iya.

Iya madah munyi nya maya bejakuka mosyen meri basa nimbal Jaku TYT Sarawak Tun Abdul Taib maya Pengerami Bejadika Aum Dun Ke-18 Renggat Keempat ditu, pagi kemari.

MAJANG RENGGI

Berebak enggau nya, Majang madah penanggul tu balat diasai sida ke gawa enggau serikat-serikat ba Taman Industri Samalaju.

“Ketegal nadai rumah ngujungka sida berundang ninting ari penyauh 120 kilometer. Tu nambahka agi penusah sida ari sukut ungkus minyak, pengelikun enggau masau jam lama ba rantau jalai,” ku iya.

Majang mega minta perintah nengeri bebendar nyapai tagit ulih meresi isu setinggan manggai taun 2020.

“Isu setinggan di sepanjai Jalai Kidurong, Jalai Tebing Pantai Bintulu-Samalaju enggau Sungai Plan meseti diputar.

“Sida ti diau setinggan ditu betapi enggau mayuh penanggul baka nadai perengka guna, pengerai, ulih kena angus enggau ke bukai.

“Ambika banding dalam timpuh enam bulan sebedau tu bisi tiga kali penusah angus nyadi ba sitak nya,” ku iya.

Nya alai, piak menteri bekaul meseti berundingka pekara tu enggau manah. Bala anak sida ke diau setinggan tentu inginka pelajar ke menyana baka orang bukai.

“Kitai meseti berunding, bala anak sida tu mega nyangka nyadi ketuai ke ngiring nengeri enggau menua jemah.

“Beduduk ari nya, aku minta piak opis menteri bekaul nyendiaka palan pengentap baru tauka rumah ungkus murah dikena mutar penanggul tu,” ku iya.