Anang ngelalaika rega barang

“Nadai ngira kedai makai tauka kedai runcit, barang ti dijual patut ngembuan penerang rega ba genap barang ti dijual sida.”

KUCHING: Resit pemakai patut ngembuan penerang pasal rega tiap pemakai ari sida ke bedagang ngambika penguna nemu rega utai diempa sida, ku Sapit Menteri Dagang Dalam Menua enggau Pekara Bebelika Barang Chong Chieng Jen.

Ku Chong, raban pedagang enda patut ngelalaika rega barang ke dijual nyengkaum ba resit.

“Nadai ngira kedai makai tauka kedai runcit, barang ti dijual patut ngembuan penerang rega ba genap barang ti dijual sida.

“Kami ba opis menteri tu seruran nerima mensia mayuh ti deka meri timbal bekaul enggau penanggul beduduk rega barang,” ku iya.

Chong madah munyi nya ngagai pemberita pengudah ngulu pengerami begulai Gawai Raya KPDNHEP 2019 di Indu Opis KPDNHEP ditu kemari.

Nangkan nya, ku iya, enti sida ke bedagang enda nerima jaku lalau tauka notis ari sida, piak KPDNHEP deka betemu tauka nanya ngagai sida ke bedagang nya.

“Sida ke ngena tau telefon terus ngagai aku enti deka meri timbal laban lumbur telefon aku endang dibuka ngagai mensia mayuh.

“Sebedau tu, aku mega bisi nerima timbal bekaul enggau pekara tu lalu aku empu udah nanya, berandau enggau sida ti ditemu salah nya,” ku iya.

Enti sida mengkang enda mendingka jaku ari piak kami, kami nadai jalai bukai tang meri saman ngagai sida tu, ku iya madah ngagai pemberita.

Ku Chong, sida ngena chara ti lebih lembut lebuh meri lalau ngagai mensia mayuh ngambika sida nyamai meri kerejasama enggau opis KPDNHEP.

“Kami enda terus datai lalu meri saman ngagai sida ke ngagai salah nya laban kami nemu sekeda sida tu semina bedagang chara mimit aja.

“Tu mih chara perintah baru bejalaika pengawa, ngena jalai ti lebih ngagai ngaul mensia mayuh,” ku iya nambah.

Suara Sarawak