Anang ngelaung menua pesisir

Servis bas sekula nadai bebayar

BETONG: Rayat nerima manah perambu Perintah Sarawak nyendiaka servis bas sekula nadai bebayar ba sekeda endur di mengeri besai.

Nya kebuah rayat andal amat perintah diketuaika Kepala Menteri Datuk Patinggi Abang Johari Tun mantu peranak menua pesisir kelebih agi nyaup ngelempungka tating belanja komunti nadai ngira dini sida diau.

Dr. Abang Ismail Abang Julhi madahka servis bas sekula nadai bebayar entara perambu ti manah dikena ngelempung tating belanja raban jelan bepenatai pemisi ti diau di mengeri.

“Aku nyukung perambu tu laban berundingka tating belanja maya nganjung anak ke sekula di mengeri besai berasai amat.

MERI PENGELANTANG… Servis bas sekula nadai bebayar dikearap ngelempung tating belanja idup di mengeri enggau menua pesisir.

“Tambah mega tu nyadi servis rama Yayasan Sarawak dikena mantu rayat Sarawak di mengeri,” ku Abang Ismail madah ngagai Suara Sarawak, ditu.

Abang Ismail ngarapka pansik sama mega deka dipejalai ungkup peminta di kandang menua pesisir.

Ku iya, tu berindik ari gaya pengawa bekenaka perengka pengangkut mensia mayuh di menua pesisir majak kurang.

Ba lansa sama, Florence Anding sepenemu enggau Abang Ismail.

“Udah chukup manah enti ulih dipejalai ba mengeri. Aku mega pechaya rayat ditu deka nerima manah inisiatif tu lalu patut dikerembai ngagai menua pesisir.

“Taja pia perintah mega patut beratika peminta servis tu laban tebal agi nembiak menua pesisir diau bemalam ba buding.

“Sida tu semina ngarapka bisi perengka pengangkut dikena pulai mandang ari buding ninting Hari Lima enggau Hari Minggu.

“Ambika chunto di Betong, bala nembiak dari ari luar ti besekula di MRSM, Kolej Vokasional enggau sekula bemalam ke bukai nadai perengka pengangkut ti meruan lalu tu ngasuh sida napi pemar.

“Enti suba bisi bas tang sida berebut laban enda tetangkupka pemayuh tubuh nembiak ti berebak pulai enggau mansang,” ku iya nerang silik.

Kaunsilor Suib Paiee madahka perambu Perintah Sarawak inisiatif ti pintar berundingka pengelantang rayat ketegal ditating belanja idup majak niki.

“Ba orang bukai nyangka utai tu baka pekara bukai tang ba aku empu chukup andal Abang Johari tu mendingka sebana rayat di mengeri.

“Nya kebuah Yayasan Sarawak ti dilempaika pengandal ngemujurka perambu tu dikearap ulih bejalaika pangku pengawa sida enggau naka ulih nentuka servis tu meri pemaik ngagai raban diselinting.

Suib mega ngarapka sekeda pasar mit di menua pesisir ulih diperambu ngembuan servis ti sama.

Hajijah Lueng muji perambu Perintah Sarawak nyendiaka servis bas sekula nadai bebayar di mengeri

“Taja apin diterang dini enggau baka ni servis tu dipejalai tang tu berita manah ngagai sida ti diau di mengeri.

“Kitai patut nerima enggau ati lantang, abis nadai servis tu deka ngelempungka pengawa kitai nganjung enggau ngambi bala anak ari sekula lalu belanja mega ulih dikelimat,” terang iya.

Iya mega ngarapka nadai ulah niki pinang, niki nibung kelebih agi ba peminta bala komuniti di mengeri enggau menua pesisir.

“Hak nembiak ti belajar sama, nadai ngira sida besekula di mengeri tauka di menua pesisir, endang patut dijaga,” ku iya nambah.

Nibak ari Suara Sarawak kena 7 Julai, Abang Johari nyemetak madah pasal perambu nya taja agi ba renggat diperambu piak Yayasan Sarawak berindik ari penanggul teknikal ti patut dikerandau begulai enggau Opis Perengka Pengangkut Darat (JPJ).