Anang nyiping hak rayat

KUCHING: Perintah Besai patut meri tanggungpengawa ngagai Perintah Sarawak ngatur peminta ngaga dokumen pengelala peranak menua tu.

Menteri Pengawa Berumah enggau Kaunsil Kandang Menua ti mega Presiden Parti Sa’ati Rayat Sarawak (SUPP) Datuk Dr. Sim Kui Hian madahka penerang ari Opis Menteri Dalam Menua ti deka ngererak Komiti Khas Sarawak ti gawa mutarka penanggul ditapi peranak nengah Pekara 15A Konstitusyen Perintah Besai ngasuh kitai asa.

“Pengawa baka tu diperati balat nyiping rayat Sarawak.

“Sarawak patut bisi hak ba ngatur peminta peranak menua tu empu,” ku iya ba sebengkah penerang.

Nangkan nya ku Sim, agi tubah peranak Sarawak apin sereta mengkang enda diterima nyadi peranak menua sida empu.

Dr. Sim Kui Hian

“Anak mit kelebih agi enda ulih besekula laban nadai surat pengada enggau tingki lalu sida dikelaung ari ngasaika hak diri empu.

“Pengidup sida tau dikesema baka kampar ba menua diri,” ku iya.

Mayuh entara sida tu agi nembiak lalu bisi sekeda apai indai napi penanggul ngenukuka diri endang amat peranak Malaysia.

“Bisi sekeda kes siku ari apai indai nembiak nya enda meri keretas kereja ti betul lebuh ngerejister anak sida.

“Tu beduduk ari penusah enggau pemar ditapi sida ke diau di menua pesisir Sarawak,” ku Sim nambah.

Kelimph ari nya ku Sim, Putrajaya enda nemu pekara ti nyadi ba Sarawak sereta nadai seling penemu pasal atur pengawa enggau peminta di menua tu.

“Pekara peranak menua tu sebagi ari pekara pemun. Tu deka meri pangka ngagai menua kelebih agi sida ke udah lama minta diaku nyadi peranak menua.

“Pengawa nangguh meri surat pengada ngagai sida meri pangka chukup besai ngagai orang nya empu laban tu tau dikumbai baka meri ukum mati ngagai sida,” ku iya nerang.

Nangkan nya, Sim minta pekara bekaul enggau peranak menua tu enda patut dibalut ngena politik.

“Kami udah beratika baka ni pekara tu ngemai pengerugi ngagai pekara rama Sabah.

“Anang ngubah Sarawak nyadi baka Sabah,” ku iya madah nyemetak.

Suara Sarawak