SIBU: Isu nyual pemakai enggau ai irup abis timpuh agi ditemu ba sekedai premis dipegai Kaunsil Mengeri Sibu (MPS) lalu nambah pengirau bekaul tikas pengelikun pemakai ba mengeri tu.

Sapit Chairman Komiti Pengerai Mensia Mayuh, Rampa Menua enggau Servis Mengeri MPS, Kaunselor Yiing Sy Huat madah, asil meresa tetemu ke bisi sekeda pedagang kedai kupi agi nyimpan stok ti udah lama.

Ku iya, bisi pedagang meri kedalih enda ngeleda ke pekara nya laban bekal dianjung pemekal tang kedalih nya enda ulih diterima.

“Pedagang enda tau enda nentuka tiap produk ti diterima dipresa dulu kelebih agi timpuh pemakai nya dikena nyamin pengelikun penguna,” ku iya nyemetak.

Yiing mantangka jaku nya lebuh operasyen meresa ngenyit ba sekeda kedai kupi di Jalai Wawasan, malam ensanus.

Ku iya, taja produk nya dipeda agi baru tang udah abis timpuh lebuh diperesa silik.

Nambah ke nya, Yiing nyemetak madah ke tikas pemeresa ba dapur kedai ti diperesa apin ngemantup ati lalu meseti diadu manah agi.

Entara penyalah ti dikereja iya nya dapur beminyak enggau lichau, pinggai mangkuk sereta sengkalan jai enggau kamah kelimpah pengereja enda ngena kereban nyaga diri baka kasut betutup, apron enggau sengkabung pala.

Isu bukai mega diberi perati iya nya pengawa ngena pemantis minyak ti enda nitih ke spesifikasyen.

Ku Yiing, bisi kedai ti ngena sistem enda penuh ngujungka teda minyak terus dibuai ke dalam parit.

“Enti nitih, pemantis minyak patut bisi tiga renggat dikena nyerara teda, ai enggau minyak,” terang iya.

Lebuh meresa belakang kedai nya, sida tetemu ke lapis minyak tebal taja pen pengempu kedai nya madah ke sida udah meresi endur nya.

Ba operasyen nya, enam kedai udah diperesa ke alai lima ari nya diberi notis nyaga pemeresi lalu siti da dikompaun ketegal ngereja penyalah.