Anang sengapa pejah, pebasaka pilih pengundi

“Enda ibuh bekelikuh isu Dr Rayong enggau parti diarika iya, amat pan belanja MRP enggau RTP udah ‘dirampas’ ari jari iya. Kebuah pia, laban ngelama tu iya enda kala puntan ngagihka belanja pemansang di Dun tu sekumbang agi dalam perintah.”

ENGKILILI: Bala ketuai renggat baruh ba sitak Kunsil Nengeri (Dun) berasai nyima enggau penerang sekeda nembiak ari Gempung Parti Sarawak (GPS) ti nadai bepampul mejah pengari rayat ke udah dipilih pengundi ditu.

Beduduk ari nya nitihka sebengkah penerang, bala ketuai ditu ngarapka ulah ti baka nya diketu laban beratika jasa pengari rayat ditu ke chukup siru sereta mentas enggau rayat Dun Engkilili.

Tuai Rumah Pindi Gerang ari Empelam, Skrang Ili nyemetak madah orang luar lebih agi sida ke agi puda penemu dalam dunya politik tau enda ibuh ngajar rayat ditu sapa ke patut dipilih jemah.

“Kami ditu nadai ibuh diajar kita sapa ke patut dipilih ngiring…kami udah suah napi pengawa bepilih dibanding enggau kita ke baru sekali dua ngundi. Nyadi kami nemu sapa enggau parti ni ke patut dipilih ngarika Dun Engkilili,” ku Pindi.

TR PINDI GERANG

Penemu ke sebaka mega dibantaika Tuai Rumah Chaong Baringgai ari Memaloi, Skrang ti madah semina Dr Jonichal Rayong Ngipa nengah parti ti diarika iya agi diterima pengundi ila.

Ku iya, pengundi enda kiruh ni pemayuh pengawa pemansang diberi ungkup Dun tu udah tu dikena nginti undi tang Dr Rayong tetap dipilih sida.

“Enda ibuh bekelikuh isu Dr Rayong enggau parti diarika iya, amat pan belanja MRP enggau RTP udah ‘dirampas’ ari jari iya. Kebuah pia, laban ngelama tu iya enda kala puntan ngagihka belanja pemansang di Dun tu sekumbang agi dalam perintah,” ku iya.

Udah nya, Tr Engkoi Sandah ari Skim Skrang madah, penerang dipansutka Micheal Tiang enggau Roy Gingkoi sebedau tu mandangka pemabu runding seduai iya ba politik.

“Seduai iya nyangka deka nguingka runding ketuai renggat tinggi lebih agi dalam SUPP enggau PRS tang pengawa ke bansa nya patut digaga enggau bisi kebuah ke patut anang semina mejah pengari rayat Engkilili aja,” ku iya.

Tandu iya, manah agi dua iku tu meri penemu baka ni deka nyekat tsunami pengundi Sarawak lebih agi bansa Dayak awakka enda mantaika pengeringat ba peti undi ila.

“Semua bela nemu rayat agi enda lantang ati enggau mayuh pekara lebih agi ba pemuntan mutar ungkus pengidup ke majak niki,” ku Engkoi.

Ngelansa penerang Tiang enggau Roy ti bisi ati deka ngerampas Dun Engkilili apin lama ke udah, iya madah sapa-sapa aja tau nguji nasip di Dun tu ba Pengawa Bepilih Besai Nengeri (PRN) deka datai enda ngira nya ari parti gempung dalam nengeri tauka Perintah Harapan.

TR CHAONG BARINGGAI

Suara Sarawak