Ai bisa ke dijual nadai dikemendar tau ngeruga pengerai
KUCHING: Pengawa meli enggau ngirup ai bisa ke nadai dikemendar tau meri pangka enda manah ngagai pengerai penguna.
Kenu ku Sapit Menteri Dagang Dalam Nengeri enggau Pekara Penguna (KPDNHEP) Chong Chieng Jen, ai bisi ke nadai dikemendar nya tau bendar ngeruga pengerai penguna laban chara ngaga enggau utai ke dikena nyampur ai bisa nya enda ditemu.
Ai bisa ke nadai dikemendar tu dibagi ngagai ai bisa tiru enggau ai bisa dibai tama belalai.
“Lebih 40 bebadi nyawa diripot ba Semenanjung Malaysia ketegal mabuk ngirup ai nadai dikemendar bisa taun nyin kemari.
“Penyadi ke sebaka mega ulih nyadi di nengeri tu dudi hari enti kitai enda bejimat,” ku iya.
Iya madah munyi nya rambau aum pemberita pengudah bejadika Kimpin Penyedar Pasal Ngirup Ai Bisa enda dikemendar 2019 Renggat Nengeri Sarawak, kemari.
Chong madah pengawa ngirup ai bisa nadai dikemendar majak nyadi ba Sarawak laban pengawa mai tama ai nya belalai ari adan.
“Rega ke murah entara kebuah penguna milih meli ai bisa nya taja nemu iya nadai dikemendar.
“Produk ke nadai dikemendar endang barang ke nadai dikemendar piak bekuasa lalu nadai mayar chukai baka ke udah diletak undang-undang,” ku iya.
Kenu ku iya, urung 5.5 peratus chukai ari ai bisa ungkup perintah.
“Perintah rugi beratus juta ringgat ketegal produk ke nadai nitih undang-undang enggau mayar chukai.
“Pekara tu ngerugi enggau nekul pemansang digaga perintah ke bepanggai ngagai penatai pemisi industri,” ku iya.
Kimpin nya diatur begulai enggau KPDNHEP enggau Confederation of Malaysia Brewers Berhad (CMBB).
