KUCHING: Pengundi ba sitak Kunsil Nengeri (DUN) Jepak dilalau enda tunduk ngagai politik duit tang meseti bejalaika tanggungpengawa enggau lurus.
Presiden Parti Bumi Kenyalang (PBK), Voon Lee Shan madah, rayat ba nengeri tu kelebih agi pengundi ba sitak DUN enda patut muntang ditunduk enggau upah ti diberi sekeda orang ngambi ngulihka undi.
“Penanggul pengundi ba menua pesisir iya nya mayuh ari sida kelalu seranta baka ba pengawa bepilih suba, sida seruran ngundi chalun enggau parti ti ulih meri sida upah,” ku iya ba siti penerang, tadi.
Taja pia, ku Voon, bepelasar ke pekara ti dipeda iya empu, pengundi kelebih agi ari menua pesisir gaga enggau bantu lengkas enti dibanding enggau pemaik timpuh panjai.
Ketegal nya, pengudah pengawa bepilih mit suba, peranak menua pesisir suah agi belabuh besebana pasal nadai bekal ai, elektrik, jalai alun ti enda manah enggau nadai klinik ba sitak sida kelimpah lenyau tanah sereta sungai ti kamah.
Berebak enggau nya ku Voon, taja pen iya nemu PBK dipeda baka ke nadai peluang menang ba Pengawa Bepilih Mit (PRK) Jepak kena 4 November tu, parti nya enda mantul ati.
