ANDY Brc ukai nama baru ba industri muzik Dayak laban iya udah lama mekuhka pengawa belagu berengkah ari taun 2015 suba nyentuk diatu.

Penanyi asal ari Betong nya mujur ngeluarka lagu pemadu baru diri ti pejuluk Sama Keran kena 20 Julai tu tadi ba pelasar YouTube Andy Brc Production.

Naka diatu, lagu bepadu nyawa enggau penanyi Yaya Chen nya mujur dipeda lebih 20,000 orang sereta nerima kelai like urung 200 ari mensia mayuh.

TUA DITEMU PETARA
Ngelansa silik senentang lagu nya, Andy Brc madah, jalai cherita dalam lagu Sama Keran nya endang bekenang ke kisah pengidup iya empu.

Iya madah, lagu nya bekenang ke pemesai pengerindu enggau pengeran ati iya ngagai siku indu ti mujur muka baru pintu ati iya.

“Keterubah aku betemu enggau indu tu maya aku benung merindang ba sebengkah palan pemerindang.

“Aku labuh pengerindu keterubah meda iya lalu berengkah ari nya meh kami duai bela bekunsi pengasai sebaka.

“Lalu ngujung ke kami duai mutus ati nanggam pengerindu sereta bedanji deka begulai jadi melaki bini nyentuk nyawa lesi.

“Lagu Sama Keran tu ditengkebang aku empu dikena mandangka pengerindu ti besai ngagai sulu ati diri.

“Perambu asal, aku endang keran deka bepadu nyawa enggau sulu ati aku nyadaka lagu Sama Keran tu tang iya enggai laban malu.

“Bisi sekali, penanyi Yaya Chen ngiga aku lalu mantaika pengingin diri deka nguji bepadu nyawa enggau aku.

“Aku pen meri peluang ngagai iya bepadu nyawa enggau aku nyadaka lagu Sama Keran tu,” tusui Andy Brc.

BAKA TAPANG BISI REMBIA
Single but not available. Nya genteran jaku ti chukup engkeman dikena nusui senentang status penanyi Andy Brc.

Kebuah pia laban pintu ati iya ti udah lama tekunchi ngelama tu mujur dibuka siku indu ti chukup betuah.

Pengudah labuh pengerindu ngagai pangan diri lebuh keterubah mata betentang mata ba sebengkah palan pemerindang, Andy Brc enggau indu betuah nya bela bedanji nyimpul tali semaya.

Pengerindu tuchi ti datai ari mata lalu labuh ke ati pemadu dalam nya diatu majak bebungai enggau angat baka panchar mata panas.

Pandak jaku, penanyi sigat tu enda nyalah baka lubuk diuan baya, baka tapang diuan rembia.

Nya alai, bala peminat semua aram meh kitai besampi ke pengelantang enggau pemujur kaul seduai ngambi ulih begulai nirika rumah tangga baka orang bukai.

Ngenang baru lagu Sama Keran nya tadi, Andy Brc madah, siti pesan ti patut dipelajarka kitai ari lagu nya, kembuan meh ati tuchi maya nanggam pengerindu enggau pangan diri.

“Begulai manah lalu kelala ati budi pangan diri tang enti udah jadi melaki bini, naka ulih meh ngetan pengerindu tuchi nya nyentuk nyawa lesi,” ku iya.

CHUNTO MANAH NGAGAI ANAK
Seraya nusui pejalai diri ba dunya pemerindang, Andy Brc madah, iya berengkah tepejuh ba dunya pemerindang industri muzik Dayak tu ba taun 2015 lebuh umur iya manggai 50 taun.

Minat ba pengawa belagu nya endang dikembuan iya ari jeman agi bujang suba nyentuk diatu.

Taja pen umur jauh udah berinsur tang nya enda nagang iya nyapai juluk deka ngeluarka lagu diri empu.

“Aku chukup minat ba pengawa belagu kelimpah deka meri chunto beguna ngagai bala anak enggau anak menyadi aku.

“Enti kitai ngembuan juluk deka nyadi artis, kitai patut ngamatka juluk tu enggau ngembuan pengandal ati ngagai diri empu.

“Bala anak aku enggau anak menyadi aku endang minat ba pengawa belagu tang sida nadai ngembuan pengandal ati ngagai diri empu.

“Nya alai, aku deka meri chunto ngagai sida ngambi ransing ngerembai enggau ngemansangka minat dikembuan sida.

“Penau belagu ti dikembuan kitai patut dikunsi enggau orang bukai lalu ukai semina ditengalika kitai kediri aja,” ku lalau iya.

Andy Brc madah, enti ari sukut umur, iya nyau enda tentu engkeman nyadi penanyi tang ketegal deka meri chunto manah ngagai bala anak, dia deh iya mutus ati ngaul pengawa merindang.

“Diatu aku mujur nyadi siku artis Dayak sereta mujur ngeluarka mayuh lagu diri.

“Pengudah meda pejalai aku ba pengawa tu, dia deh bala anak aku berengkah nunda singkang aku,” ku iya.

Ungkup penerang, penanyi beumur 58 taun ti ngempu nama Welfred Jana anak Rebai nya mujur ngeluarka lapan lagu diri.

Nya nyengkaum lagu Dara Senawah Bulan, Aki Agi Sigat, Ngatu Kediri, Asaika Dalam Mimpi, Joget Sulu Ati, Sulu No. 1, Berubah enggau Sama Keran.

RANSING MASUK PEKIT BELAGU
Ketegal ngembuan minat ti besai ba pengawa belagu, Andy Brc suah enggau orang ngeruh ai masuk bemacham pekit belagu.

Sekeda ari pekit belagu ti kala dipasuk iya nyengkaum pekit belagu ti diatur CMD ba Hotel Li Hua, Sibu sereta mujur bulih penuduk kedua.

Iya bela bulih penuduk kedua ba pekit belagu ti diatur ba Mahligai Apai Pub lalu mujur tama renggat kepenudi ba pekit belagu ti diatur ba Kenarau Pub, Miri.

Nambahka nya, ba pekit belagu ti diatur Barrock Pub ba Dangdut Star, New Harrison Idol, pekit belagu diatur beserimbai Gawai Bazar Kuching enggau Kuching Idol, iya mujur tama ba renggat kepenudi.

“Ba timpuh lapan taun udah ngaul diri ba dunya pemerindang tu, aku udah dikangau merindang ba mayuh palan pemerindang lebih 200 kali.

“Nya nyengkaum bemacham pub, kelab malam, rumah asap, kafé, bistro, palan karaoke, funfair enggau mayuh pengerami.

“Aku ukai semina dikangau merindang ba selampur Sarawak tang bela dikangau merindang ba Semenanjung Malaysia,” terang iya.

PENGUJI MERINDANG
Baka bala penanyi Dayak ti bukai, Andy Brc enda tinggal napi bemacham penguji sekumbang ngaul dunya pemerindang.

Siti ari penguji ti kala diasaika iya baka kala enda dibayar maya dikangau merindang kelimpah bayar kelalu mit enggau enda nitih pematut.

Ukai naka nya aja, iya kala ngasaika peneleba lebuh program merindang dikinsil ba minit kepenudi.

Sekumbang menua kitai dituntung pengerekai penyakit COVID-19, pengawa merindang enggau begelumu bebala mayuh sigi ditagang perintah dikena nagang pengerekai igi penyakit nya.

TIBAR PERANSANG
Pemungkal Andy Brc Production nya ngarapka diri ulih nyadi chunto enggau ikon ngagai nembiak rebak baru mekuh pengawa belagu.

“Amat pen udah lunggar umur tang aku ransing deka merindang mensia mayuh kelebih agi bala peminat ba atas panggau.

“Enti kami ti udah lunggar umur tu ulih ngemujurka minat diri, kita ti agi biak sereta ngembuan penau belagu patut ngemansangka minat kita.

“Kitai meseti berani nyingkang ke mua nunda udi enggau singkang orang bukai lalu anang nengali penau nya kediri aja.

“Pekara ti manah patut dikunsi kitai enggau semua orang ngambi kitai ulih begempung nyagu industri muzik Dayak tu ngagai tikas ti tinggi agi.

“Aku mega deka nengkebang enggau ngeluarka mayuh lagu baru ngagai bala penanyi ba baruh Andy Brc Production tu empu.

“Tu nyengkaum penanyi Bong Nyau ti nyadaka lagu Dendam Enda Padam, penanyi Yaya Chen bepadu nyawa nengah lagu Sama Keran enggau penanyi Sandy Michael ti nyadaka lagu Joget Bujang,” terang iya.

Ngena peluang berega tu, Andy Brc meri terima kasih ngagai bala peminat diri ti enda leju nyukung enggau besampika pejalai iya ba dunya pemerindang nyentuk diatu.

Iya mega beterima kasih ngagai bala pengempu palan pemerindang ti seruran ngangau iya merindang mensia mayuh ba mayuh palan pemerindang.

“Enda tinggal mega ngagai sulu ati aku, kami sebilik, kaban belayan enggau bala bakih ti seruran nyukung enggau besampika pengawa aku merindang.

“Terima kasih mayuh-mayuh. Ketegal sukung ari kita semua meh aku ulih beretan ba industri muzik Dayak tu nyentuk sehari tu.

“Aku bedanji deka ngeluarka mayuh lagu baru diri dudi hari enggau nempa mayuh penanyi baru ba baruh perabung Andy Brc Production.

“Begempung meh kitai ngangkatka industri muzik kitai ngambi bediri sama tinggi, duduk sama baruh baka industri muzik bansa bukai,” lalau iya.

Lebuh dirandau senentang industri muzik Dayak kemaya hari tu, Andy Brc madah, diatu industri muzik Dayak majak maju enggau richah ari sepuluh taun ti udah.

“Aram meh kitai begulai nyukung industri muzik bansa diri ngambi richah agi dudi hari sereta dikelala semua orang ari serata dunya,” tandu iya.