SEMANGAT enggau pengeransing siku indu Iban ti gawa ngintu ruang bilik diri, Angela Ann anak Awal mekuh pengawa dagang patut dipuji enggau dichunto.

Pekara nya ulih dipeda kitai ba pengawa iya numbuhka serikat kediri empu ti diberi nama Havenu Shalom Enterprise ti ngeluarka produk Kupi Dara Lawwa (KDL).

Produk KDL nya chukup manah ke pengerai enggau pengeregas tubuh sekali ke ungkup raban indu tauka lelaki.

Tebal agi sida ti kala meli produk KDL tu meri timbal ti chukup manah laban tubuh sida berasai regas enggau majak bepengerai pengudah ngirup kupi tu.

Berebak enggau nya, KDL tu nerima mayuh peminta enggau majak dikelala di selampur Malaysia kelebih agi Malaysia sereta ngembuan pemeli tetap kediri empu.

NGEREMBAI DAGANG

Ukai naka nya aja, Ann bela ngerembaika dagang diri ngagai produk bukai baka ngaga pekayan buri lalu nya udah berengkah dipejalaika iya ari taun nyin kemari.

Iya bulih buah runding ngaga produk buri nya pengudah beranakka anak ketiga tauka anak pengkuan iya.

Ann madah, iya nadai pengawa dikereja pengudah beranakka anak ketiga lalu ari nya iya tebuka ati nunda orang bukai begagaka produk buri.

“Aku ukai bansa orang ti puh diau jenuh nadai pengawa dikereja laban jari aku tu semampai ‘gatal’ meseti ngereja utai.

“Nya alai, meda orang begagaka produk buri, dia aku pen berengkah nunda sida dikena ngisi maya lepa.

“Endang amat keterubah suba tu semina dikena ngisi maya lepa aja tang diatu nyau nyadi dagang laban aku meda buri tu bisi pengulih besai dikemansang.

“Pekayan buri ukai semina dikerinduka bansa Dayak aja tang semua orang enda ngira penempa lalu nyadi trend enggau pisin kemaya hari,” ku terang iya.

NARIT ATI

Iya madah, penemu ngaga buri nya ukai dipelajarka iya ari orang bukai tang sigi dipelajarka iya empu nengah pengawa meda asil keranjai jari orang ba sebelah YouTube enggau TikTok.

Ku iya, pengudah meda asil keranjai jari sida, dia iya nguji ngaga kediri nitihka kreativiti enggau ukir ti dikerinduka iya empu.

Tampung Ann, maya sekula suba, iya sigi ngambi kus seni lalu nya mayuh mantu iya ngaga produk buri kelebih agi maya ngaga ukir buri.

“Aku ngepunka pengawa ngaga produk buri tu ari siti selampai ti sigi digaga ungkup diri empu aja lalu dipandangka aku ba sebengkah berami di rumah panjai.

“Kami semenua ti bela ngulu pengerami tu nyau begau meda pemanah selampai buri ti digaga aku.

“Sida mega enda ngetu muji pemanah enggau pengemas asil keranjai jari aku lalu mayuh sida minta gaga ke aku lalu ti bukai minta ajar aku.

“Aku mega bela bekunsika gambar selampai tu ba sebelah media sosial sereta nerima timbal ti chukup manah ari mensia mayuh kelebih agi bala bakih.

“Ari nya aku bulih buah runding deka bedagangka produk buri tu,” ku tusui Ann.

NARAK KREATIVITI

Ann madah, enti dipeda mata baka ti chukup muntang ngasilka produk buri laban nadai mayuh perengka dikena ngaga.

Tang ti bendar, ku iya, lebuh kitai empu ngaga, nya baru kitai nemu pemar, pengiruh enggau pemayuh kereban ti dikena ngaga.

Tampung iya, pemar ukir pen ulih nentu timpuh pengelama ngaga produk buri laban mar agi ukir dikedeka kitai, lama agi ga timpuh nembu ke siti produk nya.

“Sekeda perengka dikena aku ngasilka produk buri tu baka keretas manila, guntin, pensil, gam kain, jarum, ubung enggau leka buri.

“Keterubah, kitai enda tau enda nero ukir ti dikedeka ke kitai ba keretas manila nya tadi, tembu nya baru berengkah ngempat ukir ti didero kitai ngambi manah dipeda.

“Ukir tu mih utai ti pemadu beguna laban enti ukir nya enda manah, asil buri ti digaga kitai pen enda manah sereta timpang dipeda.

“Ti bendar, pengawa ngaga produk buri tu mayuh begunaka pengelandik seni kelebih agi ba pengawa nero ukir kelimpah nyungkak kreativiti enggau inovasyen.

“Enti ukir tu udah tembu didero, aku pen mindahka ukir nya ngagai skirt, selampai, tango, vest enggau ti bukai ti deka digaga kitai nyadi ke buri.

“Nya baru kitai ngelekatka leka buri lalu dijait ngena ubung nitih chura ti digaga kitai dulu tadi,” terang Ann.

Ba pengawa ngulihka perengka dikena ngasilka produk buri tu, Ann sigi bisi pemekal kediri empu baka skirt enggau leka buri.

Iya ukai semina ngaga buri ti udah tembu aja tang bela ti apin tembu mega sereta bisi nyual leka buri enggau perengka bukai ti dikena.

Nangkan nya, iya bisi ngaga sereta nyual skirt, selampai, tango enggau vest ti agi puang tang udah tembu diukir lalu bala pemeli semina patut ngelekatka leka buri aja.

Rega produk buri nya bepanggai ba pemar chura dikedeka ke penguna, pemesai skirt enggau pemayuh kereban dikena.

Ba pengawa ngaga produk buri nya, Ann nadai bepanggai ba bantu belanja ari perintah lalu belanja dikena iya meli perengka diguna nya endang asil ti diulih iya ari pengawa nyual produk diri.

ENDA CHUKUP JARI

Sekumbang mekuh pengawa ngaga buri, Ann nadai tentu nyengala napi penanggul ba pengawa nya laban iya semampai nerima timbal manah ari bala penguna ti datai ari selampur Malaysia.

Taja pia, ku iya, siti penanggul ditapi iya baka suah suntuk bekal buri laban mayuh penguna meli ba penyampau ti mayuh tauka murung ari iya.

“Lebuh musin pengerami baka nyerumba Hari Gawai, Krismas enggau Taun Baru, aku sigi enda chukup jari enggau kaki ngereja pengawa tu kediri.

“Peminta bala penguna maya musin pengerami chukup mayuh tang orang ti ngereja semua tu semina aku kediri aja.

“Nya alai, lebuh musin pengerami, aku enda tentu ulih tetangkupka peminta penguna ti bangat mayuh.

“Berebak enggau nya, aku pen kekadang nyau ngaji kami serumah empu ngambi bisi mantu aku nyait buri tu.

“Peminta bala penguna tu sigi enda putus semampai bisi belama ninting hari tang lebuh musin pengerami, peminta tu nambah belipat.

“Puji Tuhan, sekumbang bejalaika dagang buri tu, berekat Tuhan chukup manah, peminta semampai bisi belama,” ku tusui Ann.

Nampung nya, ku iya, mayuh orang ba rumah panjai kelebih agi sida ti indu bela rindu meda pemanah produk buri digaga iya.

Iya madah, sekeda sida bisi ati deka meli enggau ngembuan produk buri ngambi bisi dikena enggau dipandang maya pengerami.

“Taja pia, bisi ga sekeda semina ulih meda aja laban enda chukup belanja dikena meli.

“Sinu ga anak ati aku meda sida ingin meli tang nadai duit disua laban kitai bela nemu orang rumah panjai ukai semua beduit enggau bepemisi.

“Berasai amat ati aku ditegu meda sida lalu aku pen tebuka ati meri peluang ngagai sida ngempu produk buri tu tang dibayar pupuk ninting bulan.

“Mereti aku pengasai ati sida lalu nya kebuah aku nyendia inisiatif bayar pupuk ninting bulan tu. Pengaga berasai amat tepanchar ba mua sida,” ku Ann nusui peneleba iya bejualka buri.

PENGELEBIH TEKNOLOGI

Seraris enggau pemansang teknologi sereta juluk Perintah Sarawak ti deka nguing ngagai dunya digital, Ann bela ngena teknologi nya ngelakuka produk iya.

Iya ngena pelasar media sosial baka Facebook, TikTok, Instagram, WhatsApp enggau ti bukai dikena ngelakuka produk iya ngambi majak dikelala mensia mayuh.

Nambah ke nya, iya bela bisi ejen kediri empu ti mantu iya nyual enggau ngelakuka produk buri nya.

“Konsep ti diguna aku tu ukai semina nguntungka aku aja tang bela meri pemaik ngagai bala ejen aku ngulih penatai pemisi ari pengawa nya.

“Produk buri tu nyelai enggau narit ati. Nya alai, aku masang juluk deka ngerembai enggau ngelakuka asil buri tu ngagai peranak menua luar.

“Nengah dagang buri tu, aku keran meransang bala indai ti gawa ngintu ruang bilik rejister nyadi ejen aku ngambi sida ulih nyungkak penatai pemisi tambah ari dagang tu,” terang iya.

Pedagang nyulut nya ngelalau raban indu enda takut tauka irau ati ngerembaika pengelandik sida sereta ransing belajar dikena nyungkak kreativiti enggau inovasyen.

Iya madah, pekara nya beguna amat ngambi sida ulih besemekih enggau beretan lama ba pengawa dipasuk sida kelebih agi ngaul pengawa dagang.

“Aku ukai indu ti landik ba pengawa ngaga kraf jari tang ati aku keran deka nguji pekara baru lalu tu mih ti mai aku belajar ngaga kraf buri nyentuk ulih nyungkak ngagai pengawa dagang.

“Nambah ke nya, aku siku kaban Gerempung Kraf Malaysia enggau Sarawak kelimpah nyadi kaban Gerempung Pedagang Kraf Simanggang,” ku peransang Ann.

Ungkup penerang, Opis Pengintu Pengelantang Komuniti (JKM) Sri Aman kala ngelempai pengandal ati ngagai Ann ngaga buri nyadi tepa ngagai Menteri Pemansang Indu, Nembiak Mit enggau Pengelantang Komuniti Sarawak, Datuk Seri Fatimah Abdullah.