Anjung diri swab test enti kala mindah jauh

KUCHING: Barang sapa ngasaika diri mudah kena rampit dipinta nganjung diri swab test Covid-19 ba klinik pengerai tauka sepital peribit besemak.
Direktor Opis Pengerai Nengeri Sarawak (JKNS) Dr Chin Zin Hing nyemetak madah tu nyengkaum sida ti kala mindah entara pelilih menua ke bisi kes dirampit kandang dua minggu ke udah.
Ku iya, sekalika sida nya ngusung diri sebilik, bala bakih tauka datai ngulu pengawa rami sereta penusah rabat patut beperesa pengerai diri empu.
“Entara pelilih menua mudah dirampit Covid-19 nyengkaum Bagi Menua Sri Aman, Betong, Sibu, Kanowit, Dalat, Miri, Beluru enggau Sebauh.
“Enti sema kita bisi ngasaika diri enda nyamai isi enggau bisi kelai baka batuk, tabin, pedis rekung, nyawa penat tauka madai isi lalu udah mindah dalam timpuh disebut, kita mesti swab test,” ku iya.
Dr Chin madah, sida ke kala ngusung bala bakih tauka kaban belayan ti udah mindah entara pelilih menua udah hari ke udah mega patut beperesa.
Iya mega ngelalau peranak rumah panjai ke bisi kelai sebaka nganjung diri berubat enggau beperesa Covid-19.
“Tu berindik ari mayuh kes positif Covid-19 ditemu berampit ba rumah panjai kandang sebulan tu.
“Nya alai kerejasama ari semua kita begunaka amat ngambi kitai ulih ngerintaska rantai igi penyakit tu,” tambah Dr Chin.