PERENGKA pengangkut ai kelebih agi servis bot ekspres chukup beguna ba menua Sarawak sebedau rentayan Jalai Besai Pan Borneo digaga.

Servis ekspres mengkang dikena peranak ba menua bedau datai jalai, ti semina ulih dilawa nengah jalai ai aja.

Kelimpah ari nya, servis bot ekspres suba endang nyadi perengka pengangkut chukup beguna endur kitai bekirumka barang, mansang enggau pulai sekula sereta mayuh guna bukai.

NAMPUNG PENGAWA APAI

Serak tu, Ruai Suara Sarawak udah ngerandau siku deriba bot ekspres ke pasar Sibu ari Passin, ti agi ngemeranka pengawa nya nyentuk sehari tu.

Bepeneleba deriba bot ekspres sepengelama 31 taun, Ansam anak Ex-Penghulu Asan, agi ngemeranka pengawa nyadi deriba bot ekspres ti suah dianti mensia mayuh ba kandang menua Passin.

“Aku terubah nyadi deriba bot ekspres tu dalam taun 1992, nampung dagang kami sebilik lebuh nya,” ku iya ngepunka randau.

Ansam madah, serikat bot ekspres diberi nama ABC Passin udah ditumbuh apai iya empu, Penghulu Asan anak Nanang urung taun 1960.

“Ba taun 1970, pengawa deriba bot ekpres tu ditampung menyadi apai aku iya nya niang Robinson Nyanggau anak Nanang.

“Lalu ba taun 2017, pengawa tu pulai ngagai aku lalu ditampung aku nyentuk sehari tu lalu bot ekspres nya diempu aku diatu,” ku iya.

REGAS DANI PAGI

Ansam mega madah, kenyau ari iya nemu deriba bot ekspres ba taun 1992, iya enda jugau lalu enggau orang beambika lisin dikena deriba bot ekspres.

Lebuh bejalaika dagang bot ekspres, iya endang semampai tumu dani urung pukul 3 pagi laban deka nyendiaka diri ngambi bala penumpang.

Tang sebedau berengkah bejalaika pengawa, iya deka dulu meresa enjin enggau bot ekspres enggaika bisi penanggul, lalu pengawa nya endang digaga iya tetiap kali sebedau gawa.

“Maya pukul 3 pagi, aku endang dani lalu nyendiaka diri deka bejalaika dagang bot ekspres aku enggau beambika bala penumpang.

“Udah tembu pengawa aku meresa enjin, kira pukul 3.30 pagi aku pan lalu berengkah bejalaika bot ekpres ari Sungai Passin sereta sangkai ba Sibu urung pukul 7.30 pagi.

“Penyampau tubuh orang ke nepan ti ulih dibai dalam bot ekspres aku iya nya 80 ba sekali bejalai,” ku iya nusuika pengawa diri.

TAMBANG PATUT

Ansam mega madah, tambang ungkup tuai besai iya nya RM20, nembiak beumur 12 taun enggau biak agi semina RM10 aja siku.

Lalu bayar tambang barang baka peti undang semina RM20 sepeti enggau tambang tekuyung ti dipinta penyampau RM20 seguni.

Ba pengawa bejalaika dagang ba servis nya ku Ansam, iya dibantu siku anak petunggal iya empu ngambi pejalai pengawa deriba bot ekspres lanchar.

Ngenang taga pejalai bot ekspres iya mudik ke Sibu, Ansam madahka sida i endang nitihka gintir diri laban ba menua Passin bisi tiga buah bot ekspres bejalaika servis.

“Nyadi enggi aku, enti aku udah bejalaika ekspres sehari, udah nya aku diau dua hari dikena meri awak ngagai bakih ke sama ngemeranka dagang bot ekspres ba menua kami tu.

“Laban ba menua Passin semina bisi tiga buah ekspres aja lalu kami udah ngaga taga dikena nganti gintir diri,” terang iya.

Ku Ansam madah baru, enti iya mupuk ari Passin urung pukul 3.30 pagi, datai ba Sibu 7.30 pagi lalu mulaika diri ari Sibu pukul 1 tengah hari sereta datai ba Passin baru urung pukul 4.30 lemai.

Ba pengawa iya bejalaika dagang deriba bot ekspres tu, mayuh amat penguji udah kala diasaika iya baka maya ai langkang enti salah pilih arus tau tepanggai ba atas pasir.

“Pia mega, enti maya bisi ambun, jalai tauka tebing sungai enda ulih dipeda lalu enti mayuh apat kayu larat, utai nya meh ngujika penyikal kami deriba.

“Laban enti enda diseliahka tau ngasuh pila enggau sap bot ekspres bingkok lalu ungkus dikena ngaduka enti rusak enda kurang ari RM2000,” ku iya.

MACHAM RAGAM

Bekunsika sekeda cherita ti kala nyadi ku Ansam, sekumbang iya deriba bot ekspres, bisi penumpang madahka diri nadai duit dikena mayar tambang lalu nganti di pasar baru ulih mayar tambang.

Tang ku iya, udah datai ba pasar lalu ngelarika diri nadai dipeda agi ngujungka tambang enda dibayar.

“Bot ekspres ti dikena aku begigaka belanja tu endang dijaga aku enggau naka pemanah ambikka enda mudah rusak tauka betegar.

“Aku suah ngechat bot ekspres tu enggaika iya jampat rusak kelebih agi betegar ketegal ai masin ambika ulih dikena aku begigaka belanja nengah dagang aku tu,” ku Ansam.

Ba pengujung randau, Ansam sempat bekunsika jaku peransang ari niang apai iya ti nyadika kenang ti semampai dikeingatka iya.

“Ku niang apai aku, iya endang mesan ngagai aku ambika neruska dagang tu laban ku iya enti kitai deka meda duit ninting hari, kitai mesti rajin.

“Lalu enti nuan bekuli, nuan semina sebulan sekali meda duit, nya alai tampung meh dagang ekspres kitai,” ku iya nusuika pesan niang apai iya ti seruran dikingatka Ansam belama iya.