Tusun kedua …

“Iya meh burung nya nyau kelalu mayuh, sida pan lalu ulih naban ke aku terbai ka langit kin.

“Iya meh nyau lama kelama udah terbai dia tali ke dikena aku nanchang burung nya pan nyau putus seputus lalu burung pan nyau lepas selepas.

“Aku pan lalu labuh ga ba tanju kita tu,” pia ku iya nusui cherita diri empu ke manjuk sehari nya.

“Nasip nuan labuh ba tanju kami ditu. Uji enti nuan tak labuh di ai tasik tauka ba tengah kampung, nya baru nuan parai,” pia ku orang mayuh bejaku enggau iya.

Semua orang Panggau Libau sekayu rumah nya pan lalu ketawa magang magang meda pemeli sereta ninga cherita Apai Sali nya tadi.

Udah nya iya lalu diasuh sida Keling sebilik tama ke rumah, lalu duduk ba ruai sida Keling berandau enggau orang mayuh ke bisi nungga iya dia.

Enda lama udah duduk ba ruai nya alai Kumang bini Keling lalu nganggau ke sida bebai makai ke bilik.

“Makai kitai aya.”

“Au! Aram meh makai. Lapar bendar perut tu,” pia ku Apai Sali nyaut Kumang.

Semua sida ke dia lalu tama ke bilik magang magang. Nyadi lebuh ke makai nya, dia sida Keling nadai utai bukai ke lauk, tak semina daun subung aja.

Iya meh baru ka nyengkau lauk Apai Sali tak enda mukai mukai mangkuk lauk ke ka di kauk iya nya tadi tak lalu siuh nanjah pah iya ke benung duduk besila ke ka berengkah makai.

“Akai apai, akai indai!”

“Nyin langit tu tanah, pedis amat pah aku tu laban betu,” pia ku iya ti benung nyau ngerising neritik ai mata nat ka pemedis laban betu.

Orang ke enggau iya betunga makai dia pan lalu beguai ga mukung pah iya nya tadi enggau garam.

Nyau tachuh sida Keling serumah begau jamah Apai Sali nya tadi sereta lalu enda nyadi makai laban ti tembu begau ke iya ti balat betu.

Kira dua tiga hari udah nya, betu pah Apai Sali pan nyau majak balat bendar.

Semua abi betu nya pan nyau majak luluh sereta ngeliti kulit, nyau chinang chinang merah sereta meletur.

Ka ati tudah Apai Sali tu pulai tang enggai ga nyadi di bai iya bejalai.

Nyau enda alah tat ke iya agi nyepi diri empu udah lama ninggal ke rumah, iya pan lalu madah kediri ka pulai ngagai sida Keling.

“Oh! Akan Keling! Aku tu nyau ka pulai, tang meh enda dapat bejalai. Arap ke kita meh ulih nganjung aku lagi,” pia ku iya.

“Enti nuan tak enda dapat bejalai, lak ke kami meh nganjung nuan pulai lagi aya,” pia ku Keling nyaut iya.

Udah nya Apai Sali pan lalu dianjong sida Keling mulai kediri ngagai rumah sida.

Nyadi Keling ke nganjung iya nya tadi nadai chara bukai laban iya ti enda tau bejalai ka pan enda lalu di ma Keling ga iya ba belakang.

Bedau lama udah Keling ti ngema iya, dia iya lalu madah kediri empu pedis bendar ga pah ti betu nya.

“Akai rai! Enggai aku di ma baka tu, pedis bendar pah aku tu ti betu.

“Uji bai ma pakap engka nyamai agi jangka aku,” ku iya madah ngagai Keling.

“Nadai ma bukai nya aya, sigi ma pakap meh baka tu. Kati ku ma pakap ku nuan deh aya,” ku Keling nimbal iya.

Ma sida Keling meh tudah Apai Sali tu tadi, nama nya diberap, nama nya di ma, nama nya di san meh iya nya tadi sepemanjai jalai ti pulai ke rumah.

Nyadi tudah Apai Sali ke dianjong sida Keling nya tadi tak naka iya pengaga lalu tuchum ketawa kediri empu ti naka iya penyamai dianjung orang pulai ari Panggau Libau udah ti betu pah sereta labuh ba tanju sida Keling.

Iya meh kira penumbas iya dia Apai Sali lalu mai ngetu laban madah ke pah iya nyau majak pedis sepedis.

“Akai indai! Akai apai! Enggai nyadi di ma kita asai tu, tak naka iya pemedis pah aku tu.

“Enggai aku tu nyadi di ma pakap asai tu,” pia ku Apai Sali ti nyau kutap kutap majak ngumbai nya ukai ma pakap munyi ku ati iya.

Nyadi orang ke nganjung iya nya nyau nadai penemu sereta jaku agi. Nyau puas sida ninga iya ituk sereta kutap kutap sepemanjai jalai ke pulai nya nyebut, ma pakap.

Sida pan nyau naka iya pengelelak besilih ngema iya sereta ikak laban panas.

Keling pan nyau pedis ati ninga iya ti ituk ka minta ma pakap munyi ku iya, lalu nyintak duku iya sereta ngetas randau temedu ke ba tisi jalai ke alai sida ngetu laban ninga Apai Sali ke nyau rauh rauh madah kediri pedis.

Keling lalu ngambi randau nyau lalu nanchang Apai Sali. Sintak iya enggau randau ba punggung lalu di ma iya pelawik ke belakang, enda peduli ka Apai Sali ka tauka enggai laban ti udah pedis ati ke iya ti udu meraya ba sida ti ka nganjung iya pulai.

“Akai! Akai! Lapa kita tak ka munuh aku! Pedis bendar aku tu dipasong kita baka tu!

“Mati aku tu! Lepas ka aku tu! Uji ba ma engok ba bau kita nya baru nyamai agi.”

Apai Sali rauh rauh minta kasih ari sida Keling sambil ati Apai Sali tu sigi ka beduan sida Keling ke nganjung iya pulai.

Ninga iya munyi nya Keling lalu muka tanchang temedu nya ari tubuh iya.

Apai Sali pan nyau bebelat bebaring ari tuchung bukit ba tisi umai sida. Keling lalu mutap sereta ngeransi.

“Kami tu tak ditundi nuan sereta dikemeli. Makin kami udah manah ka nganjung nuan pulai, nuan tak ngambi peluang ka beduan kami.

“Agi ga nuan tak semina nemu nganu kami sepemanjai jalai tu. Nadai kami tu ulih nganjung nuan agi lalu nemu bansa ma ke ka nuan nya,” pia ku Keling.

Tudah Apai Sali pan nyau gisai gisai nat kediri empu udah bekau ti bebelat bebaring ari tuchung bukit.

Tubuh iya nyau abis rajai laban duri enggau babas. Betu ba pah iya nya pan nyau abis bedarah bai tepangka ba batu.

Iya pan lalu mupuk mulai kediri betungkat sereta bekelansat ngagai rumah sida laban sida Keling nyau enggai nganjung iya agi.