DEBAK: Raban Penyaga Orang Periman Malaysia (APM) Pelilih Debak diatu chakah nyikap penuh diri napi musin landas enggau ai pasang ti ulih ngasuh penusah bah nyadi.
Pegawai APM Pelilih Debak, Leftenan Nur Fikry Usop madah, genap taun bisi sekeda genturung pendiau ditu dituntung penusah bah.
Berebak enggau penusah nya, ku iya, APM seruran nyikap diri napi penusah nya ari sukut pemayuh tubuh enggau reta dikena.
“Taja pen perintah udah ngambi insiatif bejalaika projek selapat bah sereta nyeleti sistem parit tang kitai tetap nyikap diri napi penusah nya.
“Pekara ti dikumbai kitai penusah endang datai ngenyit sebarang maya.
“Kitai ngarap bala volunteer APM bejalaika pangku pengawa sida enggau manah lebuh napi sebarang penusah.
“Sida meseti nemu bejalaika atur enggau ngembuan semangat gawa beraban ti besai,” ku iya.
Fikry mansutka jaku nya rambau bejadi Kus Pemun Volunteer APM Renggat Keterubah Pelilih Debak ba Palan Aktiviti Komuniti KEMAS ditu, kemari.
Terang iya, mensia mayuh dilalau ngambi semampai bejimat enggau gaya ti nyadi ngelingi sida.
Kus nya diatur dua hari berunggu sereta dipasuk 43 bala volunteer.
Iya madah, raban nya diberi latih kawad kaki, pekara pemun senentang APM, chara pemun meri bantu ngenyit, telih enggau bedarah, patah enggau praktikal, bantu enseput, engkelan sereta ditanchang.
Fikry nyemetak madah, genap penemu enggau pengelandik diulih sida meseti dikena enggau manah.
