Aram nyereta Pekit Beganu Online diatur Asadia

KUCHING: Perais RM500 nganti champion Pekit Beganu diatur Akademi Serakup Dayak Iban Sarawak (Asadia) nengah chara online.

Berindik ari pemujur Asadia ngatur pekit ngajat trofi Sapit Kepala Menteri nengah chara online, diatu Asadia deka ngatur pekit Beganu Trofi Datuk Sri Dr. Stephen Rundi Utom nengah chara ti sebaka.

Dalam siti penerang media Asadia kemari, pekit tu deka dibuka berengah 1 Ogos ngagai 16 Ogos taun tu.

Bala penyereta semina diasuh nganjong klip video beganu sida ngagai emel Asadia iya nya asadiabt7@gmail.com.

Ku penerang nya, champion pekit deka dibagi ngagai dua bengkah iya nya nitihka markah ti diberi akim enggau penyampau ‘like’ ba ‘facebook’.

TAU NGUJI…Atur pekit beganu online ti deka diatur Asadia.

Perais mata duit deka diberi ngagai penyereta champion (RM500), lumur dua (RM300), lumur tiga (RM150), lumur empat enggau lumur lima (RM100), lumur enam (RM70), lumur tujuh (RM50) kelimpah perais bukai baka trofi, midul enggau perais ‘like’ ba media rama.

Mensia mayuh ti deka nyereta pekit tu tau betanya ngagai Ketuai Asadia Mabong Unggang ba lumur 0126925562 tauka sekretari pekit Victoria Jimmy ba lumur 0122161485.

Ungkup penerang mensia mayuh, beganu siti ari main asal Iban ti ditemu bisi dikembuan sekeda menua baka di Bintulu enggau Tinjar Baram.

Pengawa beganu tu manah laban iya beguna ke pengaya jaku Iban enggau pengelandik ngerintaika leka jaku ti betali enggau engkeman.

Tuju pekit beganu diatur endang dikena ngading orang, meri perangsang, mantaika sebana ati enggau mayuh agi tuju bukai.

Kelimpah ari nya, pengawa beganu mega ngundan pengaya jaku Iban enggau pengelandik nyada ke serengu nyawa.
Nya alai, pekit beganu manah amat dikena nyadi siti chara kitai ngenan sereta ngerembaika jaku Iban.