KOTA SAMARAHAN: Ekspo Sesingkang ke UiTM (ESKU) 2019 diatur empat hari berunggu, berengkah ari 29 Mac nyentuk 1 April tu.
Urung 26 bengkah palan pemandang nerima penatai mensia mayuh kelebih agi bala nembiak ti bisi ati nampung pelajar di Universiti Teknologi MARA (UiTM) ba tikas diploma tauka degree.
Ku Mohamad Syahiran, siku nembiak ti nampung pelajar diploma ba Fakulti Hotel enggau Pengatur Dagang Temuai UiTM, tebal agi sida tu datai nemuai sereta betanyaka palan pemandang.
“Batang tu ngatur ekspo tu ukai semina ungkup fakulti kami aja, tang ngaul fakulti bukai mega.
“Kami endang nerima penatai semua kelebih agi sida ti angkunka pelajar dagang temuai tauka hotel,” ku Syahiran lebuhka dirandau Suara Sarawak.
Ku Syahiran, sapa bagi ti rindu bejalai matau menua sereta sikar ngereja pengawa endang diperansang betanyaka penerang ngagai sida.
“Pelajar tikas diploma bisi dua taun setengah endur belajar lalu enti sema deka nampung pelajar ngagai tikas degree, nambah dua taun agi.
“Taja pia, tikas degree semina bisi disedia ba UiTM Semenanjung tauka Sabah,” ku iya madah nyemetak.
Seraya Zaidi Wasli enggau Clement Jimel, pengelicha ari Fakulti Seni enggau Rekaan UiTM madah naka dua hari ekspo tu udah diatur, urung 100 iku udah ngusung palan pemandang sida.
“Ngagai bala nembiak ti deka nampung pelajar ba fakulti kami, tau datai ke ekspo tu seraya ngiri penemu baru.
“Sida ti deka nampung ba fakulti kami ukai semina mai pemutus peresa tang mega port-folio tauka asil jari sida ba pengawa seni,” ku Zaidi, pengelicha Seni Halus.
Ku Zaidi, tu sebagi ari pengilap suah digaga bala nembiak ke deka nampung pelajar ba fakulti sida.
“Bala nembiak tau minta asil jari diri ba sekula sekondari suba ari pengajar sida laban ari asil jari nya, kami ulih ngelala penau sida sereta diterima nampung pelajar ba kus ke disedia ditu.
“Pia mega, sida patut nyikap diri ngena penemu pasal kus ti deka dipinta, ukai semina datai pia aja,” ku jaku lalau iya.
Palan pemandang nyerumba Ekspo Sesingkang ke UiTM 2019 nerima penatai mensia mayuh berengkah ari pukul 9 pagi nyentuk 5 lemai di Dewan Jubli UiTM Kampus Samarahan.
