KUCHING: Perintah Besai dikearap enda ngurangka agih belanja ngagai Sarawak berindik ari Bank Dunya ngaku Sarawak nengeri bepenatai pemisi tinggi.

Premier Sarawak, Datuk Patinggi Tan Sri Abang Johari Tun Openg madah, nengah pengawa ngaku Sarawak nyadi nengeri bepenatai pemisi tinggi empai lama deka meri empas ari sukut subsidi.

“Pekara dikeirau aku nya kitai bestatus nengeri bepenatai pemisi tinggi enggau formula Bank Dunya nya lebuh kita nyapai penatai pemisi ditetap, sida deka narit pulai insentif.

“Nya kebuah, aku ngarapka subsidi ke bisi diatu enda ditarit pulai kelebih agi Perintah Besai.

“Sida enda tau narit agih belanja nya taja kitai nengeri bepenatai pemisi tinggi.

“Kebuah pia laban mayuh pekara meseti dipejalai kelebih agi nyungkak penatai pemisi rayat ba menua pesisir,” terang iya.

Abang Johari mansutka jaku nya ba aum pemberita pengudah betuaika Aum Kaunsil Presiden GPS 2023 di Palan Aum Borneo Kuching (BCCK), malam ensanus.

Ku iya, pengawa ngaku nyadi status nengeri bepenatai pemisi tinggi nya nitihka kira Penatai Pemisi Menua Kasar (PNK) per kapita.

“Nya alai, kitai deka nambah penatai pemisi tuai bilik lalu pekara ti dikereja kitai diatu nya kitai deka bisi polisi ke alai kitai deka ngagihka penatai pemisi ngagai rayat nengah bemacham projek di baruh Strategi Pemansang Pengudah COVID-19 (PCDS) 2030.

“Reti iya, batang tuju kitai nya nyungkak ekonomi sereta status rama rayat menua pesisir lebuh nyendiaka infrastruktur pemun sereta nyendiaka pemansang bakat ngagai nembiak ngambi Sarawak agi ulih terus maju lalu nyungkak penatai pemisi rayat menua pesisir,” ku iya.

Abang Johari ke mega Menteri Wang enggau Ekonomi Baharu madah, iya udah mai isu penyeranta ngagai Unit Perambu Ekonomi Ekonomi (EPU) Perintah Besai ngambi beratika takar penyeranta tauka pengaya seraya nyemetak madahka takar nya meseti nitihka reta enggau ukai penatai pemisi.

“Kitai nyau bulih tikas mesekin lalu agi mayuh berejister dalam e-Kasih tang bisi sekeda sida ulih meli entukar chara tunai.

“Nya alai, Perintah Sarawak deka ngaga pansik kediri pasal tikas penyeranta ba menua tu,” ku iya nyemetak.

Pun bulan April tu tadi, Abang Johari madahka Perintah Sarawak deka bejalaika pansik nakar tikas penyeranta menua.

Pansik tu mega deka dipejalai EPU Sarawak lalu disadang tembu taun tu.

Pekara tu deka mungkur pansik dalam ari raban profesional nyengkaum pakar ekonomi enggau pakar pemansik.

Nengah data ti digumpul nentuka pengawa ngubah polisi munas penyeranta di menua tu ulih dipejalai.