KUCHING: Kaban Kunsil Nengeri (Adun) Batu Kitang Lo Khere Chiang enda tinggal meri Selamat Hari Pengada ngagai Tuai Pemegai Menua (TYT) Tun Abdul Taib Mahmud ti ke-84.
Iya ti mega Chairman Kaunsil Kandang Menua Padawan (MPP) ngarapka Tun terus mujur, bepengerai sereta lantang belama.
“Kitai beterima kasih ngagai Tun laban ketegal iya kitai bisi Sarawak baka kediatu.
“Ketegal iya mega kitai bisi ngembuan rizab menua penyampau RM30 billion,”ku iya.
Khere Chiang bejaku munyi nya ngagai pemberita nyerumba Aum Pemberita Projek Ngaga Balai Kampung Haji Baki ditu, kemari.
Tandu iya, TYT mujur udah nagang parti ari Semenanjung tama kitu sekumbang nyadi Kepala Menteri menya.
“Ketegal iya parti Umno, Pas enggau parti Semenanjung bukai enda ulih tama ke Sarawak baka ti dipeda kita maya diatu,” ku iya.
Mayuh pengawa digaga maya Hari Pengada TYT taun tu taja diintu nitihka chara baru nyengkaum ngelancarka stesen televisyen keterubah menua ti dikumbai TVS.
