Asa ketegal sulu, nyau deka munuh diri

SIBU: Ketegal belaya enggau sulu ati iya, siku indu Filipina nyau deka munuh diri tang mujur dipuntanka Opis Bomba enggau Penyah Penusah Sibu ba ditu, kemari.

Indu nya duduk ba atas perabung ringkat tiga sebuah begunan di Jalai Kampung Nyabor nguji deka munuh diri ngujungka mensia mayuh ke besemak nya begau urung pukul 7 pagi.

Penyikar Opis Bomba enggau Penyah Penusah Sibu meri penchelap sereta ngumbuk indu nya, dia indu nya enda nyadi munuh diri.

Pengari Kepala Opis Bomba enggau Penyah Penusah Zon 4 Sibu, Pemesai Kanan Bomba 11 (PgKB II) Wan Kamaruddin Wan Ahmad lebuh madahka pemberita ba ditu, indu nya dikelala nama Cartago Pasamba, 29, peranak menua Filipina.

“Kami nerima kangau ngenyit kena pukul 7.36 pagi lebuh mensia mayuh minta bantu laban tepedaka siku indu nguji deka munuh diri.

KELALU TUSAH ATI… Indu nya dipeda duduk kediri ba tisi perabung tusah ati pengudah belaya enggau sulu ati iya di Filipina.

“Bisi lapan iku raban ari Balai Bomba Sentral nepan sebuah perengka enggau ambulans EMRS ngagai endur nya,” ku iya nerang.

Wan Kamaruddin madah, indu nya ditemu nguji deka munuh diri lalu nyabak ketegal tusut runding maya raban bomba datai ba endur nya.

“Raban bomba ngempat rantai pintu pagar ba ringkat baru lalu niki tangga ba belakang begunan rumah kedai nya sebedau bejaku enggau indu nya ngambi enda ngereja pengawa ke benung dirunding iya,” ku iya.

Kenu ku iya, sepengudah indu nya dipeda lantang, raban pengelikun mai indu nya ngagai sitak ke lebih likun,

“Raban aku mantu mai indu nya ngagai bilik endur iya diau ba ringkat tiga pengudah iya meri kerejasama.

“Operasyen tembu penuh kena jam 8.22 pagi,” ku iya nambah.

Nangkanka nya, piak polis mega bisi ba endur nya seraya mai indu nya ngagai balai diambi keterangan.

Nitihka infomasyen, indu nya siku indai tunggal belaya enggau sulu ati iya ti diau ba Filipina.