KOTA SAMARAHAN: Pelilih Asajaya bisi pengulih dikemansang nyadi siti mengeri satelit lebuh dua projek besai iya nya ngaga padang bilun enggau penyangkai kapal ti baru di Tanjung Embang.
Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah madah, pemansang besai infratruktur enggau pengawa ngaga Jalai Besai Tebing Tasik deka ngubah landskap nya.
“Bepelasarka timbal ari komuniti lokal ti dipeda aku, sida endang randa ke pemansang.
“Lebuh pemansang besai datai ngagai pelilih tu, tu deka ngangkat Asajaya sereta rega tanah ditu enggau peluang ekonomi,” ku iya.
Karim mansutka jaku nya rambau dirandau pemberita pengudah Pengerami Ngelalu Pengabang Aidilfitri Renggat Asajaya ditu, sehari tu.
Tampung iya, dua projek besai ti dilanggur di Tanjung Embang iya nya padang bilung enggau penyangkai kapal deka nyadi penyungkak ngagai ubah besai pelilih ngelingi nya.
“Enti kitai meda ngagai pelin, jematan deka digaga ari Tanjung Embang ngagai dua pulau digaga mensia enggau siti agi jematan deka nyambung endur nya ngagai Tembirat enggau Sambir.
“Berebak enggau nya, pelilih tu deka mansang nyadi siti mengeri satelit enti pelin tu ditampung,” ku iya.
