KUCHING: Pengawa nyual produk kraf serimbai Regata Sarawak ngembuan potensyen ngelui RM2 juta taun tu.

Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah madahka penyampau nya kebendar bedau ulih ditukuka laban pengawa bejual nya tembu kena lemai Hari Minggu, tang iya optimis penyampau jual ngulihka penyampau jual baka taun siti nyin kemari iya nya RM2.4 juta.

“Timbal ti mayuh chukup meransang ngagai Pengerami Kraf enggau Dapur Sarawak mandangka pengawa tu ukai semina nyadi pematak temuai aja, tang mega meri peluang dagang ngagai orang dagang menua tu.

“Ungkup kraf aja, taun siti nyin kemari asil jual manggai RM2.4 juta, enti enda salah aku.

Sehari tu (ensanus) bedau tembu agi laban pengawa bejual nya agi bejalai nyentuk ke malam tu.

“Nya alai, aku melaba kitai ulih nyapai selinting ngagai RM2 juta ungkup kraf,” ku iya lebuh dirandau pemberita ba pengerami nutup Regata Sarawak, ditu, ensanus.

Abdul Karim nambah, pengerami taun tu mega bisi ngemataka pengawa ngemanahka langkar palan bejual kraf dikena meri pengelantang ngagai bala temuai, kelebih agi sida ti deka bebelika barang.

Ku iya, enti sebedau tu palan bejual diengkah ba kededua piak palan pemandang, langkar baru ngemeratka pengawa bejual ba sepiak kanan, lalu sepiak kiba diungkupka ngagai jalai temuai.

“Taun tu, gaya diatur manah agi.

Bala temuai ti datai bebelika barang kraf ulih mindah enggau lantang agi,” ku iya.

Tandu iya, Dapur Sarawak mega nerima penemuai ti meransang, taja pan penyampau jual barang pemakai bedau dijapai lebuh pengawa nya tembu.

“Pengerami tu mega disukung enggau penatai bala temuai sereta diligit antarabansa ti bisi di Kuching ke ngulu bemacham pengerami, nyengkaum Aum Besai ICOMOS ti mungkur 1,800 iku diligit ari 109 menua.

“Kelimpah ari nya, konvensyen antarabansa etnik Cawan ti ngempuru urung 1,500 penyereta ari serata dunya mega meri empas ngagai pemujur aktiviti dagang temuai enggau ekonomi menua tu,” ku iya.

Berindik ari nya, Abdul Karim ngarapka timbal positif ari temuai ari menua luar, penyiru peranak enggau pemanah servis hotel besemak Tebing Sungai Kuching ulih mandangka potensyen besai pengerami nya nyungkak ekonomi enggau dagang temuai Sarawak. – RUSNAN MUSTAFA