KUCHING: Niat pinchin ulih diperunding baru nyema agi dikeandal parti enggau rayat agi meri mandat ngambi bediri minta pilih ba Pengawa Bepilih Besai (PRU) Sarawak ke-13, ku Datuk Seri Fatimah Abdullah.

Penyandang Kunsil Nengeri (DUN) Dalat nya madah, pengawa sedia nampung servis nya nipak semaya Parti Pesaka Bumiputera Bersatu (PBB) ngambi terus gawa seagi diguna enggau dikeandal parti.

“Sebedau tu, aku suah madah engka udah datai maya pinchin ba dunya politik laban gaya umur.

“Tang, enti aku agi bulih sukung rayat enggau tuai Gempung Parti Sarawak (GPS) sereta PBB, aku sedia gawa laban tu mih semaya PBB,” ku iya.

Fatimah madah munyi nya lebuh dirandau pemberita pengudah nerima penemuai basa Tuai Opis Pansik Penyalah (JSJ) PDRM Indu Opis Polis Kontinjen (IPK) Sarawak, SAC Kumarasan Muniandy di Begunan Baitulmakmur II, ditu kemari.

Ngenang silik, iya ti mega Tuai Raban Indu Parti PBB mega madahka tuai komuniti ba sitak nya dekaka Fatimah nampung servis nyadi pengari rayat.

“Taja pia, mandat rayat enggau parti nyadi penentu penuduk aku nyadi chalun laban bediri minta pilih ngena lambang parti, ukai ngena nama diri empu.

“Nya kebuah, aku sedia gawa nyema diberi mandat berindik ari agi tubah agenda pemansang ba sitak nya apin tembu enggau meseti ditampung,” terang iya.

Iya nyemetak madahka diri deka bebendar gawa kelimpah rikod servis nya ulih nyadi pemun berati ke penyulut iya gawa ngelama tu. – ZAHID ZAKI