KUCHING: Asil tetemuka 20 spesies engkatak baru di Sarawak ngayanka pengaya pengeraja asal biodiversiti enggau pemanah rampa menua ti tulin di nengeri tu.
Sapit Premier Sarawak, Datuk Amar Awang Tengah Ali Hasan madah ke penerang ari Sarawak Forestry Corporation (SFC) udah mantaika asil ari pengawa pansik kolaboratif ti mungkur saintis menua tu enggau tikas antarabansa.
“Aku tekenyit meda bemacham bansa engkatak ti ditemu nengah pansik nya, ti mega ngaul raban pemansik ari menua kitai empu enggau raban pemansik ari menua bukai.
“Kami mega meda mayuh macham bansa jelu bukai ti bisi baka burung enggau utai bukai ti nyelai,” ku iya.
Awang Tengah bejaku munyi nya rambau aum pemberita pengudah tembu Program Nikika Tambai Ibu Pertiwi ungkup Bulan November ba Padang Ibu Pertiwi ditu, tadi.
Iya mega madah, pengawa tetemuka engkatak nya ngayanka pemanah ekosistem Sarawak ti ulih diuan mayuh macham jelu siga sereta nyadi indikator pemanah rampa menua di menua tu.
