KUCHING: Tiga pemain tenpin boling para Sarawak benung ransing belatih laban deka ngarika Malaysia ungkup Lumba Para-Asean ke dipelaba diatur ba nengeri taun baru (2021).
Ketuai Pematih Tenpin Boling Para Sarawak Myron Khoo madah, tiga atlit tu iya nya Roni Rugiman, Marcos Chang enggau Nur Syazwani Marais.
“Roni enggau Marcos baru dipilih ngarika menua. Udah nya Nur Syazwani kala ngarika Malaysia ba lumba Para-Asean 2017 lalu mujur bulih midul emas.
“Aku andal ketetiga atlit para tu ulih mai pulai midul emas ungkup menua,” ku iya madah ngagai Suara Sarawak kemari.
Tandu iya, merambu Malaysia nganjung dua tim nyema lumba besai nya diatur ba Sarawak.
“Siti tim para Malaysia lalu siti agi tim para Sarawak Malaysia.
“Tuju tu dikena meri peneleba ngagai bala atlit di nengeri tu ngagai pekit renggat nasional laban Sarawak deka nyadi palan endur ngatur lumba nya,” ku Myron.
Kelimpah nya, iya mega ransing ngelatih 24 iku atlit ke deka ngarika Sarawak ngagai lumba Para-Sukma Johor 2021.
Ku iya, ari 24 atlit para ke ransing belatih diatu semina 18 iku aja dipilih nyereta lumba nya.
