KUCHING: Tuai Raban Bansa Kampung Gumbang, Atok Derop udah dichiri nyadi Temenggong Komuniti Bidayuh Bagi Menua Kuching ke baru.
Iya ke datai ari Pelilih Bau mangku pengawa nya nyilih penuduk Temenggong Datuk Austin Dimin Niyon.
Menteri Pelajar, Inovasyen enggau Pemansang Sarawak, Datuk Sri Roland Sagah Wee Inn udah nyuaka surat chiri ngagai iya ke alai pengawa nya dikemataka Sapit Sekretari Perintah Sarawak (Pengatur Pengawa), Datu Buckland Bangik enggau Residen Bagi Menua Kuching, Norleha Shariff.
Pengawa nyuaka surat chiri nya udah diatur di Begunan Kaunsil Pemansang enggau Pengintu Tanah (LCDA) ditu kemari.
Berebak enggau nya, Sagah ngarapka Temenggong Atok ulih bekerejasama enggau bala pegawai pelilih sereta pengari rayat di Pelilih Kuching.
Nambah ke nya, iya meransang komuniti Bidayuh meri sukung ngagai Serakup Bansa Dayak Bidayuh (DBNA) ke nyadi semina siti nya aja gerempung Bidayuh ke nyulut taja mayuh gerempung bukai.
Iya madah, Sarawak nyadi wilayah diuan rayat ke diau lantang enggau bebasaka pangan diri.






