Atur undi pos patut dikerembai agi

KUCHING: Bersih Sarawak minta Komiti Pengawa Bepilih (SPR) nambahka atur undi pos patut dikerembai agi ngagai rayat Malaysia kelebih agi rayat Sarawak enggau Sabah ti diau enggau gawa ba luar ngambi ngemuntang pengawa ngundi maya Pengawa Bepilih Nengeri (PRN) ke deka datai.

Chairperson Bersih Sarawak, Ann Teo madah, chara nya engkemang laban bisi dipasuk ba Peraturan 3 (1)(e) Peraturan Pilihanraya (Undi Pos) Peraturan 2003.

“Perkara tu udah dipejalai sebedau Pengawa Bepilih Besai 9PRU) 2018 ngambi nambahka agi chara ngundi pos ba semilan ejensi perintah nyengkaum Bomba enggau Penyah Penusah, Opis Rumah Jil, Penerit Adat Maritim enggau opis bukai ti gawa maya hari ngundi.

“Nya kebuah, barang sapa ti udah rejister nyadi pengundi dibaruh Peraturan Pilihan Raya (Pendaftaran Pengundi) 2002 enggau raban komuniti ti udah digazet SPR nyadi pengundi enggau udah dirintai patut nerima keretas undi pos enggau ulih nyadi pengundi pos nitihka Peraturan tu,” ku iya meri penerang kena 6 Ogos tu tadi.

Terang Teo, chara tu meransang pengawa ngundi pos ti engkeman amat enggau utai ke nyadi ba menua ketegal pandemik Covid-19.

Kelimpah ari penanggul pengerai enggau perengka pengangkut mensia mayuh, tambah bilun pulai ke menua mega mar laban kurang peminta ari bala penguna.

“Nya kebuah, Bersih ngasaika chara tu ulih dikena ungkup rayat Sarawak enggau Sabah ti diau, nampung pelajar tauka gawa ba nengeri bukai ba Malaysia enggau ngazet pengundi Sabah Sarawak ti diau ba Semenanjung nyadi raban pengundi pos baru.

“Nya alai, Bersih 2.0, Bersih Global enggau Gerempung Ukai Dikuasa Perintah (NGO) bukai udah mantaika penemu ba pekara ti sama ngambi chara bekaul Pengundi Enda Datai ulih diubah.

Ku Teo, piak bekaul mesti beratika isu nya laban pekara tu ngaul hak demokrasyen rayat lebuh nentuka pengari rayat sereta pemansang nengeri.

Dulu ari nya, Bersih Sarawak madahka diri asa enggau penerang Menteri ba Opis Kepala Menteri ti bempu tanggungpengawa bekaul undang-undang ti nulak penemu madahka rayat Sarawak ti diau ba Semenanjung ngundi ngena chara Undi Pos.

Menteri nya madahka nadai undang-undang ti meri pemendar ngagai pengundi Sarawak ti diau ba luar sarawak ngundi nengah Undi Pos.

Suara Sarawak