KUCHING: Aum Keterubah Penggal Kelima Kunsil Nengeri (DUN) Sarawak Ke-19 dipenyadi Tuai Pemegai Menua (TYT) Sarawak, Tun Pehin Sri Wan Junaidi Tuanku Jaafar ba Kompleks Kunsil Nengeri (DUN) Sarawak, pagi kemari.
Penatai Tun Wan Junaidi enggau bini iya, Toh Puan Datuk Patinggi Fauziah Mohd Sanusi urung pukul 9.30 pagi dikelalu Speaker DUN Sarawak, Tan Sri Datuk Amar Mohamad Asfia Awang Nassar enggau Premier Sarawak, Datuk Patinggi Tan Sri Abang Johari Tun Openg.
Pengerami bejadi aum nya dipun enggau lagu Negaraku sereta Ibu Pertiwiku ari Raban Band Polis DiRaja Malaysia (PDRM) lalu ditangkan pengawa meresa kelai basa ari Tun Wan Junaidi.
Pengawa meri basa tu mungkur 105 raban Pasukan Gerakan Am (PGA) ti diulu ke Sapit Superintenden, Amirol Mahathir Mohamad Khoiri.
Pengudah belagu lagu Negaraku enggau Ibu Pertiwiku, Tun Wan Junaidi enggau bini pansut ari Padang Kawad disempulang Abang Johari ngagai Kompleks Aum laban deka ngenatai jaku bejadi ba mua 80 Kaban Kunsil Nengeri (ADUN) Sarawak.
Ba hari terubah aum, bisi dua ADUN enda datai iya nya Sapit Menteri Pelajar, Inovasyen enggau Pemansang Penau ti mega ADUN Simanggang, Datuk Francis Harden Hollis enggau Menteri Dagang Temuai Malaysia ti mega ADUN Dudong, Datuk Seri Tiong King Sing.
Wan Junaidi meri jaku pengelalu kelai bejadi aum nya urung pukul 10 pagi lalu ditampung enggau pengawa merarau ba luar kompleks.
Pengudah merarau, semua bala ADUN begambar bebala mayuh enggau Tun Wan Junaidi di mua pintu kompleks lalu program tembu urung pukul 12.20 tengah hari.
Aum Keterubah Penggal Kelima DUN Sarawak Ke-19 deka diatur pengelama lapan hari belabuh ari Hari Satu (11 Mei) nyentuk Hari Empat (20 Mei) tu.
Aum nya deka belabuh ari pukul 9 pagi nyentuk pukul 5 lemai ninting hari kelimpah ari Hari Enam (16 Mei) enggau Hari Minggu (17 Mei) tu.
