KUCHING: Aum Keterubah bagi Penggal Kedua Kunsil Nengeri (DUN) Sarawak Ke-19 berengkah sehari tu.
Aum nya dipenyadika Tuai Pemegai Menua (TYT) Sarawak Tun Pehin Sri Abdul Taib Mahmud.
Ungkup penerang aum ti berengkah sehari tu nya deka diatur sepengelama lapan hari nyentuk 24 Mei ti deka datai.
Pengudah pengawa jaku pengelalau ari Speaker DUN Sarawak Datuk Amar Tan Sri Mohammad Asfia Awang Nassar, TYT meri jaku pengelalu ngagai semua kaban kunsil nengeri.
Sama bisi datai bini TYT, Toh Puan Ragad Kurdi Taib, Premier Sarawak Datuk Patinggi Tan Sri Abang Johari Tun Openg enggau bini, Puan Sri Datuk Amar Juma’ani Tuanku Bujang enggau ke bukai.
Pengudah tembu program, semua kaban kunsil dibai begambar ba ruang besai begunan.
Aum sekali tu deka mantaika tiga Rang Undang-Undang (RUU) iya nya RUU Bekal Tambah (2022), 2023 enggau RUU Bekal Tambah (2023), 2023 ti deka dibantaika Sapit Premier Sarawak Datuk Amar Douglas Uggah Embas.
Siti agi RUU deka dibantaika Menteri Dagang Temuai, Industri Kreatif enggau Seni Pemerindang Datuk Sri Abdul Karim Rahman Hamzah iya nya RUU Kaunsil Kraf Jari Sarawak, 2023.
