Aum Parlimen patut fokus mutar penanggul rayat

SERIAN: Aum Parlimen ti deka dipejalai 13 Julai tu ila meseti meri fokus mutar penanggul ti ditapi rayat.

Sapit Menteri Wang ll Malaysia, Mohd Shahar Abdullah madahka kediatu menua benung deka angkat ari fasa penyuman ti benung dipejalai.

“Nya kebuah aku ngarapka semua kaban parlimen enda milih parti perintah tauka penyakal ngambika sama meri fokus ngagai fasa penyuman tu.

“Kebuah pia, ngambika kitai sama ulih berandau sentang chara ti patut digaga perintah tauka mantaika penemu, perambu enggau idea ti engkeman endur kitai napi dua agi fasa nangkanka tu,” ku iya.

Shahar bejaku munyi nya ba aum pemberita pengudah Program Ngelawa SMK Tebakang ditu, kemari.

Iya ti nyadi Kaban Parlimen Paya Besar madahka, Menteri Besai Tan Sri Muhyiddin Yassin udah mantaika strategi 6R ti bepelasarka pengelantang rayat.

“Laluh dua fasa agi iya nya ngelindung baru (rivitalize) enggau ngemaru (reform) nengah Bajet 2021 enggau nyikap diri ba perambu Langgur Pemansang Malaysia Lumpar ke-12 (RMK12) ba bulan Januari 2021 patut diberi perati.

“Kekedua fasa tu amat beguna lalu enda ulih dijapai enti fasa penyuman tu enda mujur.

“Nya alai, aku amat ngarapka serak tu kitai anang nyalahka siku-siku ngambika ulih nentuka pengelantang rayat,” ku iya.

Suara Sarawak