Autisme: Komuniti udah sedar, tang apin nerima

“Diatu mih maya kita nerima anak mit ti autisme tu, ukai semina ba sida apai indai, tang mega komuniti luar.”

KUCHING: Komuniti udah sedar pekara bekaul enggau penanggul autisme tang agi bisi apin nerima pekara nya.

Pakar Terapi Chara Kereja ari Palan Intergrasi Pintar Erdy Izwan Sohardi ni maya kitai kelebih agi komuniti patut nerima penanggul autisme tu.

“Pengawa dalam nyedarka komuniti tu pekara ri udah lama dipejalaika kitai.

“Diatu mih maya kita nerima anak mit ti autisme tu, ukai semina ba sida apai indai, tang mega komuniti luar,” ku iya.

Erdy madah munyi nya lebuh dirandau raban pemberita ba pengerami Penutupan Program Randau Autisme: ‘Acceptance with Love for Autism’ di Auditorium Pustaka Negeri Sarawak ditu, kemari.

Nangkan nya ku iya, komuniti diatu bisi iya ke makin nerima pendiau anak mit autisme enti dibandingka enggau suba.

“Komuniti diatu lebih meda ngagai penanggul ti dikembuan anak mit autisme lalu ngiga chara mutarka penanggul nya sereta meri pelajar ti manah ngagai sida,” ku iya.

Berebak enggau nya, Erdy mega madahka skop pengawa iya ti nyadi pakar terapi anak mit autisme.

“Tanggungpengawa aku ninting hari iya nya meresa tikas pemansang sida sereta meda ubah ba pemansang ulah sida.

“Pemansang anak mit autisme tu bisi bida nitihka tikas ti dikembuan sida,” ku iya.

Erdy ti mega bisi penanggul Disleksia madah pengawa matau anak mit autisme dipejalaika ba klinik tauka sepital.

“Kami ba Palan Intergrasi semina mantu ngubat anak mit autisme tu.

“Lalu tikas autisme dikembuan sida baka Tikas 1, Tikas 2 enggau Tikas 3 iya nya tikas ti pemadu tinggi dalam autisme,” ku iya.

Urung 200 iku mensia mayuh ti nyengkaum raban profesional, apai indai sereta anak mit autisme bisi nyereta pengawa randau ti dipejalai dua hari berengkah 3 ngagai 4 Ogos tu tadi.

Suara Sarawak