KUCHING: Premier Sarawak, Datuk Patinggi Tan Sri Abang Johari Tun Openg minta awakka Menteri Besai, Datuk Seri Anwar Ibrahim nembuka timpuh iya megai Malaysia nyentuk penggal parlimen diatu abis.

Ku iya, prinsip demokrasi patut dititih sereta ngansak raban tuai bebasaka pemutus pengawa bepilih ti udah diatur.

“Nyema Anwar udah bisi (nyadi Menteri Besai), awakka iya bejalaika pangku pengawa nya nyentuk abis penggal.

“Kebuah pia laban menua kitai bepelasarka demokrasi, lebuh pengawa bepilih udah diatur, nya meh pemutus rayat lalu kitai meseti nitihka pemutus nya.

“Nyema kitai ngetuka nya ba tengah jalai, nya ti dikumbai ‘nebuk atap’ (perintah pintu belakang) ti ngasuh pengawa nyadi enda menuku, orang ke napi penusah ila bala rayat,” ku iya.

Abang Johari bejaku munyi nya rambau Randau Tujuh Taun Begulai enggau Premier ti diatur ba Bilik Ballroom Satok, Palan Aum Hikmah Exchange ditu malam tadi.