KUCHING: Ai bah udah surut lalu naka pukul 5 lemai kemari bisi 21 buah Palan Ngenduh Sementara (PPS) udah ditutup.
Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka diatu semina tiga bagi menua agi muka PPS orang tasah bah iya nya di Bagi Menua Kuching, Serian enggau Miri.
“Bisi 22 buah PPS agi dibuka ti nyendiaka palan diau ungkup 639 ruang bilik enggau 2,414 iku orang tasah bah.
“Di Kuching 11 PPS agi dibuka ngaul 323 ruang bilik enggau 1,328 iku orang,” ku iya.
Uggah bejaku munyi nya lebuh madahka Pasal Bah di Sarawak di Dun Lama ditu, kemari.
Kelimpah ari nya, ku iya ba Bagi Menua Serian bisi 10 PPS ti ngaul 315 ruang bilik enggau 1,079 iku orang tasah bah agi dirikodka.
“Ba Bagi Menua Miri semina sebuah PPS agi dibuka ngaul sebuah ruang bilik enggau tujuh iku orang agi dirikodka,” ku iya.