BINTANGOR: Perintah Sarawak chakah nyendia fasiliti pemadu manah ungkup rayat nengah pengawa nyeleti Balai Komuniti Bintangor nengah agih belanja Program Transformasyen Menua Pesisir (RTP) ti beungkus RM227,000.

Kaban Kunsil Nengeri (ADUN) Meradong, Datuk Ding Kuong Hiing madah, projek ti diatur Kaunsil Pelilih Meradong enggau Julau (MDMJ) nya disadang tembu tumu ari langgur asal.

Iya madah, enti projek nya udah tembu ila, Balai Komuniti Bintangor ukai semina manah agi tang bela disikap ngena lapan unit aircond enggau karpet dinding dikena mutar penanggul akustik.

“Projek tu mandangka Perintah Sarawak naka ulih nyendia fasiliti pemadu manah ungkup rayat lebuh nyendia agih belanja besai bejalaika projek RTP,” ku iya.

Kuong Hiing mansutka jaku nya rambau Pengerami Taun Baru China ti diatur ba Balai Komuniti Bintangor ditu, kemari.

Ba lansa bekaul, ku iya, kaul rat entara Parti Sa’ati Rayat Sarawak (SUPP) enggau Parti Pesaka Bumiputera (PBB) Meradong nyadi pugu besai ngagai pekara ti ditegi parti nya dikena meri pemaik besai ngagai pemansang enggau pengelantang rayat.

Iya madah, kerejasama entara kededua parti nya beguna amat ngambi genap program ti dipejalai lanchar lalu pengari rayat muntang agi bejalaika pangku pengawa sida.

“Aku ngarao kaul manah entara kededua parti tu ulih ditegap laban semina Gempung Parti Sarawak (GPS) aja ti semampai meri sukung ngagai pangan diri dikena ngemeratka rayat,” ku iya.

Ba pengerami nya, Sapit Menteri Pekara Korporat, Penerang enggau Unit Komunikasyen Perintah Sarawak (UKAS) ti mega ADUN Semop, Datuk Abdullah Saidol meri 200 kek lapis ti diidang ngagai bala temuai ti ngulu pengerami nya.

Sama datai, Kaban Parlimen Tanjong Manis, Ir Yusuf Abdul Wahab, Sekretari Parti SUPP Pampang Bintangor, Kaunsilor Chieng Ming Kiong, Tuai Indu Parti PBB Pampang Meradong, Dayang Rajemah Adeng, Tuai Nembiak Parti SUPP Pampang Bintangor, Ley Chee Hua, Pemancha Yii Hee Sieng seret Penghulu Su Song Kuok.