KUCHING: Bantu belanja ngagai sekula misyen ari Unit Pekara Jalai Pengarap Bukai (UNIFOR) deka dikena ngerandang sukut pelajar digital bala nembiak ba Sekula Primari (SK) Sacred Heart Semeba.
Prinsipal SK Sacred Heart Semeba, Magdalene Lilawati madah, bantu penyampau RM102,000 ari UNIFOR nya deka dikena nyendiaka lima buah kelas ti disikap enggau kereban teknologi digital ba sekula.
“Kami dalam pengawa ngemansangka pekara pelajar kelebih agi sukut digital renggat sekula primari.
“Diatu, SK Sacred Heart ngembuan tiga buah kelas ti disikap kereban teknologi digital, tang kami beguna tujuh nyentuk lapan buah kelas agi dikena nangkup peminta pelajar 214 nembiak prasekula nyentuk nembiak Primari Lima ba sekula nya,” ku iya.
Magdalene bejaku munyi nya lebuh ditanya pemberita pengudah nguluka Chairman Kaunsil Ngatur Sekula SK Sacred Heart Semeba ti mega Tuai Kampung Semeba Thomas Gown nerima Bantu Belanja Sekula Misyen di Sarawak bagi Taun 2023 Renggat Dua ari UNIFOR di Opis Palan Servis ADUN Batu Kitang ditu, tadi.
Iya nangkan nya andalka Perintah Sarawak ulih ngaga begunan baru sekula SK Secred Heart ungkup 12 nembiak prasekula belajar ba sekula nya.
